पहुँचका आधारमा करोडमाथि अनुदान खाएर कृषि पेसा नगर्नेमाथि कारवाही गर्दै कृषि मन्त्री अधिकारी

काठमाडौं– कृषि तथा पशुपन्छी विकास मन्त्री रामनाथ अधिकारीले कृषि अनुदान दुरुपयोग गर्नेहरूमाथि कारवाहीको प्रक्रिया अन्तिम चरणमा पुगेको पनि मन्त्री अधिकारीले बताएका छन् ।

उनले देशभर वितरण गरिएका अनुदानहरूको प्रयोगबारे छानबिन भई विवरण संकलन गरिएको र केही दिनमै कारवाही प्रक्रिया सार्वजनिक हुने बताए । ‘अब खास किसानले मात्र अनुदान पाउँछन्, पहुँचवालाले जथाभावी रूपमा करोडौँको अनुदान लैजाने अवस्था अन्त्य हुन्छ,’ उनले भने ।

अबदेखि निवेदनका भरमा अनुदान वितरण नहुने भन्दै कडा मापदण्ड बनाइएको उनको भनाइ छ ।

मन्त्री अधिकारीले अनुदानको मल वितरण प्रणाली पारदर्शी बनाइएको बताएका छन् । उनले अबदेखि कहाँ कति मल पठाइएको छ भन्ने विवरण सार्वजनिकरूपमा सबैले हेर्न सक्ने व्यवस्था मिलाइएको जानकारी दिए ।

विगतमा मल वितरणमा हुने गरेको लुकिछिपी र पक्षपात अन्त्य गर्दै अबदेखि प्राथमिकतामा पर्ने किसानले मल पाउने व्यवस्था सुनिश्चित गरिएको मन्त्री अधिकारीको भनाइ छ । उनका अनुसार सरकारले मलका लागि छुट्याएको ९८ प्रतिशत बजेट मलमै खर्च गरिएको छ ।

तर, उनले किसानको मागअनुसार जति मल दिन सकिने अवस्था नरहेको स्वीकार गरे । “हाम्रो क्षमताले मात्रै पुग्दैन, सबैले बुझिदिनु पर्छ,” मन्त्री अधिकारीले भने ।

कृषि मन्त्रालयका एक कर्मचारीका अनुसार कृषिको अनुदान लिएर यो पेसा नगर्ने ९ सयभन्दा बढी व्यक्तिलाई पहिलो चरणमा कारवाहीको तयारी भइरहेको जानकारी दिए । पहिलो चरणमा राजनीतिक र अन्य शक्तिका आडमा अनुदान लिएका माथि कारवाही हुन्छ । करोडमाथि अनुदान खानेलाई कारवाही हुने तयारी र छलफल भइरहेको उनको भनाइ छ ।