साढे १५ करोड डलरको एमसीसी परियोजनामा सम्झौता,दुई प्रशारण लाइन निर्माण ठेक्का

काठमाडौं – नेपाल र अमेरिकाबीचको मिलेनियम च्यालेन्ज कर्पोरेसन (एमसीसी) सम्झौता अन्तर्गत दुई ठूला विद्युत् प्रसारण लाइन निर्माणको ठेक्का सम्झौतामा हस्ताक्षर भएको छ ।

सम्झौताले नेपालका लागि एउटा नयाँ युगको सुरुआत गरेको छ । विद्युत् प्रसारण प्रणालीलाई मजबुत बनाउन र देशभर सस्तो, विश्वसनीय र प्रभावकारी ऊर्जा वितरणको मार्ग प्रशस्त गर्नेछ ।

बिहीबार एमसीए–नेपाल, एन्जेलिक–स्किपर जेभी र वाइबा–सलासर जेभीका बीच सम्झौतामा हस्ताक्षर भएको छ । हस्ताक्षर कार्यक्रममा एमसीसीका कार्यवाहक नायब उपाध्यक्ष जोन विङ्गल, अर्थ सचिव घनश्याम उपाध्याय, कार्यवाहक अमेरिकी राजदूत जेसन मिक्स, एमसीसीका आवासीय निर्देशक डायन फ्रान्सिस्को र एमसीए–नेपालका कार्यकारी निर्देशक खड्ग विष्ट उपस्थित थिए ।

सम्झौता अन्तर्गत रातमाटेदेखि न्यू दमौली र न्यू दमौलीदेखि न्यू बुटवलसम्मको २९७ किलोमिटर प्रसारण लाइनमध्ये १८० किलोमिटरको लाइनको डिजाइन, जडान, परीक्षण र निर्माण गरिने छ । यो परियोजना नेपालका लागि विद्युत् व्यापार र क्षेत्रीय सञ्जाल मजबुत बनाउनको लागि एक महत्त्वपूर्ण कदम हो ।

कार्यक्रममा कार्यवाहक अमेरिकी राजदूत जेसन मिक्सले यो सम्झौतासँगै अमेरिकाले नेपालका दीर्घकालीन विकास र समृद्धिमा स्थायी प्रतिबद्धता देखाएको बताए । उनले भने‘नेपालमा विद्युत् र आर्थिक पूर्वाधार निर्माण मात्र नभई दीर्घकालीन विकासलाई पनि गति दिइरहेका छौं ।’

एमसीसीका कार्यवाहक उपाध्यक्ष जोन विङ्गलले भने,‘यो प्रसारण लाइन नेपालको समग्र विकासको लागि कोसेढुङ्गा सावित हुनेछ । यसले नेपालमा सस्तो र भरपर्दो विद्युत् प्रवाह सुनिश्चित गर्नेछ, जसले उद्योग, व्यवसाय र जनजीवनमा सकारात्मक असर पुर्याउने छ ।’

Image Source: © https://mulpatra.com

सम्झौतामा हस्ताक्षर गर्दै एमसीए–नेपालका कार्यकारी निर्देशक खड्ग विष्टले यस परियोजनाको समयमै र प्रभावकारी कार्यान्वयनको प्रति आशा व्यक्त गरे । उनले भने,‘हामीले यस परियोजनालाई समयमै सम्पन्न गर्नका लागि कटिबद्ध छौं । परियोजनाको कुल लागत १५.४५ करोड अमेरिकी डलर रहेको छ । यसले १८० किलोमिटर लामो ४०० केभी प्रसारण लाइनहरूको डिजाइन, स्थापना, परीक्षण र सञ्चालनलाई समेट्नेछ ।’

एमसीसी नेपाल कम्प्याक्ट सम्झौताले नेपालको लागि नयाँ आर्थिक, सामाजिक र राजनीतिक सम्भावनाका ढोकाहरू खोलेको छ । उक्त परियोजनाले नेपाल र अमेरिकाबीचको सहकार्यलाई थप सुदृढ गर्नेछ । यसका साथै नेपालको दीर्घकालीन विकास र समृद्धिमा टेवा पुर्याउनेछ ।

सम्झौतामा अर्थ मन्त्रालय र नेपाल विद्युत प्राधिकरणको सक्रिय समन्वयले गर्दा एमसीसी परियोजनाका ठेक्का सम्झौतामा सफलता प्राप्त भएको हो । यो सम्झौता नेपालका लागि मात्र एउटा ठेक्का सम्झौतासम्म सीमित नभएर दुई राष्ट्रको विश्वास र समर्पणको मूर्त रुपको प्रतीक मानिएको छ ।