तीनकुनेको क्षति महानगरलाई तिर्न राजावादीले साढे आठ लाख उठाए, बालेनले पत्र सच्याए मात्र बुझाउन अडान

काठमाडौं– काठमाडौं महानगरपालिकाले चैत १५ गतेको आन्दोलनका क्रममा तीनकुनेमा फोहोर गरेको भन्दै पूर्वराजा ज्ञानेन्द्रलाई तोकेको जरिवाना तिर्न राजावादीहरुले रकम सङ्कलन गरेका छन् । सङ्कलित रकम राजसंस्था पुनस्र्थापनाका लागि गठित संयुक्त जनआन्दोलन समितिलाई हिजो हस्तान्तरण गरिएको छ ।

महानगर प्रमुख बालेन्द्र साहले पूर्वराजालाई जरिवानाको पत्र पठाएपछि राजसंस्था समर्थकहरु आक्रोशित बनेका थिए । उनीहरुले सो जरिवाना निर्मल निवासलाई नतिराउने भन्दै चन्दा सङ्कलन अभियान चलाएका हुन् । समितिका संयोजक नवराज सुबेदीलाई ८ लाख ३९ हजार ४ सय रुपैयाँ बुझाइएको छ ।

महानगरले पूर्वराजालाई तीनकुने आन्दोलनमा प्रमुख जिम्मेवार ठह¥याउँदै ७ लाख ९३ हजार रुपैयाँ जरिवाना तोकेको थियो । जरिवानाको पत्र बुझाउन गएका महानगर कर्मचारीहरूलाई निर्मल निवासले फर्काइदिएको थियो । त्यसपछि हुलाकबाट पत्र पठाइएको महानगरले बताएको छ । निर्मल निवासले यो विषयमा कुनै औपचारिक प्रतिक्रिया दिएको छैन । तर, राजावादीहरुले तीनकुने आन्दोलनको आयोजक दुर्गा प्रसाईँको नागरिक बचाउ महाअभियान भएकाले राजालाई जरिवाना तिराउन खोज्नु बालेनको बदनियत भएको बताउँदै आएका छन् ।

समितिलाई रकम हस्तान्तरण भए पनि महानगरले पत्र नसच्याएसम्म जरिवाना नबुझाइने भएको छ । समितिकी सदस्य रमा सिंहले महानगरलाई पत्र सच्याउन भनिएको बताइन् ।

‘राजाका नाममा पठाइएको जरिवाना पत्र फिर्ता लिएर आयोजक संस्थाका नाममा अर्को पत्र पठाइयो भने हामी तिर्न तयार छौं । अन्यथा यो रकम सङ्घर्ष समितिमै रहन्छ,’ उनले भनिन् ।

आफूले महानगरका जिम्मेवार व्यक्तिसँग कुरा गर्दा पत्र फिर्ता लिन आनाकानी गरिएको सिंहको भनाइ छ । ‘उहाँहरू पत्र फिर्ता लिन तयार हुनुभएको छैन । हामी राजाका नामबाट जरिवाना तिर्दैनौं,’ उनले थपिन् ।

Image Source: © https://mulpatra.com