प्रसाईं सर्वमान्य नेता, धवलशमशेर अध्यक्ष र नयाँ रणनीति बनाउँदै

राष्ट्रिय प्रजातन्त्र पार्टी (राप्रपा) छोडेर नयाँ पार्टी बनाउन लागेका धवलशमशेर राणा नागरिक बचाउ महाअभियानका संयोजक दुर्गा प्रसाईसँग मिलेर नयाँ पार्टी घोषणा गरेका छन् ।

उक्त पार्टीको अध्यक्ष धवलशमशेर राणा बनेका छन् । प्रसाईं भने सर्वमान्य नेता हुने भएका छन् । उक्त पार्टीले पूर्णआकार भने आउने साता लिनेछ ।

राणानिकटहरूको भनाइमा अध्यक्षमा राणा र सर्वमान्य नेता चयन गर्न आन्तरिक सहमति भइसकेको छ । त्यही सहमतिअनुसार उनीहरूले पार्टीको संरचना बनाउने तयारी गरेका छन् ।

राणा र प्रसाईंको आन्तरिक सहमतिपछि पार्टी निर्माणमा लागि दुईवटा समिति गठन गरिएका छन् । पार्टीको विधान, नाम र चिह्नलगायतका लागि एउटा कार्यदल बनेको छ । उक्त कार्यदलको नेतृत्व मुकुन्दश्याम गिरीले गरेका छन् । समितिमा ११ जना छन् ।

त्यसैगरी, असन्तुष्ट र सम्भावित व्यक्तिहरूलाई पार्टीमा भित्र्याउन राजु आचार्यको नेतृत्वमा ५ सदस्यीय वार्ता टोली बनेको छ । उनीहरूले दल निर्माणका लागि ३१ वटा विभाग गठन गरेका छन् । विभाग प्रमुखहरूलाई आइतबार काठमाडौंमा आयोतिज एक कार्यक्रममा जिम्मेवारी हस्तान्तरण गरिएको छ । राणा र प्रसाईंले संयुक्त रुपमा जिम्मेवारी हस्तान्तरण गरेका हुन् ।

पार्टी एकता कार्यदल, कार्यसम्पादन कार्यदल, वार्ता कार्यदल लगायतका विभाग गठन गरिएको आयोजकले जानकारी दिएको छ । जसमा मुकुन्दश्याम गिरी, सगुनसुन्दर लावती, राजु आचार्य, धनश्वर शाही, खड्ग जिसी, ईश्वरीप्रसाद भट्टराई, केशवराज श्रेष्ठ, डा. महेन्द्रजंग शाह, दिलविकास राजभण्डारी लगायत रहेका छन् ।

Image Source: © https://mulpatra.com

नयाँ पार्टी गठन गर्न भन्दै २१ जेठमा राप्रपा महामन्त्री धवलशमेर राणा लगायतले पार्टी छाडेका थिए । त्यसपछि दुर्गा प्रसाईंको समूह राणाको समूहसँग मिलेका थिए ।

दुर्गा प्रसाईको क्रिजमा राप्रपाका नेता कार्यकर्ता समेत प्रसाई तिर आउन थालेका छन् । जसका कारण राप्रपा अध्यक्ष राजेन्द्र लिङ्देन समेत समस्यामा परेका छन् ।

प्रसाईको अभियानतर्फ राजेन्द्र लिङ्देन नेतृत्वको राष्ट्रिय प्रजातन्त्र पार्टी का केही नेता तथा कार्यकर्ता आकर्षित हुन थालेको चर्चा बढेको छ । प्रसाईंले राजसंस्था पुनस्र्थापना, हिन्दू राष्ट्र र व्यवस्था परिवर्तनका विषयलाई जोडदार रूपमा उठाइरहेका बेला राप्रपाभित्रै समर्थन आधार जोगाउने चुनौती देखिन थालेको राजनीतिक वृत्तमा विश्लेषण भइरहेको छ ।

यद्यपि, राप्रपाका नेता–कार्यकर्ता ठूलो संख्यामा प्रसाईंकै पक्षमा गएको भन्ने दाबीलाई पुष्टि गर्ने आधिकारिक तथ्य सार्वजनिक भएका छैनन् । तर राजावादी र हिन्दू राष्ट्र समर्थक मतदाता तथा कार्यकर्तामाझ प्रभाव विस्तारको प्रतिस्पर्धाले राप्रपा नेतृत्वमाथि दबाब बढाएको भने देखिन्छ ।

राजनीतिक विश्लेषकहरूका अनुसार आगामी दिनमा राजावादी शक्तिहरूबीचको एकता, नेतृत्वको स्वीकार्यता र जनसमर्थन व्यवस्थापनले राप्रपा तथा प्रसाईं दुवैको राजनीतिक भविष्य निर्धारण गर्नेछ ।