राजावादीको आन्दोलन रत्नपार्क केन्द्रित, एमालेको तयारी रत्नपार्कमै

काठमाडौं– राजसंस्था पुनस्र्थापनाको मागसहित काठमाडौंमा राजावादीले जेठ १५ मा संयुक्त आन्दोलनको थालनी गर्दै छन् ।नवराज सुबेदीले नेतृत्व गरेको संयुक्त जनआन्दोलन समितिको अगुवाइ र सबै राजावादी घटकहरूको सहभागीमा वृहत आन्दोलन हुन लागेको हो ।

उपत्यका बाहिरबाट समेत मानिसहरू उतारेर काठमाडौंमा शक्ति प्रदर्शन गर्ने राजावादीहरूको तयारी छ । राजसंस्था पुनस्र्थापना नभएसम्म आन्दोलन निरन्तर जारी राख्ने उनीहरूले बताइरहेका छन् ।

यही दिन एमालेले पनि जनप्रदर्शन गर्ने भएपछि सुरक्षा अवस्था संवेदनशील बन्ने देखिएको छ ।

यता, प्रधानमन्त्री केपी शर्मा ओलीले हिजो आफ्नो पार्टी पङ्तिलाई गणतन्त्र दिवस मनाउन सडकमा उत्रिने निर्देशन दिए । उनले त्यस दिन काठमाडौं एमालेको नियन्त्रणमा हुनुपर्ने भनेर समेत भाषण गरेका छन् । यसबाट एमाले र राजावादीबीच सिधा टकराबको जोखिम उत्पन्न भएको छ ।

संयुक्त जनआन्दोलन समितिले आफ्नो कार्यक्रम रत्नपार्क केन्द्रित गर्ने तयारी गरेको छ । गत शनिवार आयोजित जागरण सभामा १५ गते दिउँसो १२ बजे रत्नपार्क आउन आह्वान गरिएको थियो । यद्यपि, अहिलेसम्म समितिले रत्नपार्कमा प्रदर्शनका लागि प्रशासनसित अनुमति लिएको छैन ।