कृषि मन्त्रीलाई ओलीको प्रश्न ‘तपाईंहरू मल नल्याउने गाली चाहिले प्रधानमन्त्रीले खानुपर्ने

काठमाडौं– प्रधानमन्त्री केपी शर्मा ओलीले मल आपूर्तिको समस्या तत्काल समाधान गर्न सम्बन्धित निकायलाई निर्देशन दिएका छन् । सम्बन्धित निकाय जबाफदेही हुन नसक्दा नेता र मन्त्रीहरूले गाली खानुपरेको उल्लेख गर्दै प्रधानमन्त्री ओलीले सरकारको विरोध गर्नेको वाहवाही भइरहेको बताए ।

उनले हरेक सरकारी निकायहरू आफ्नो परिभाषित काममा आफैँ जबाफदेही हुनुपर्ने बताए ।

नागरिकको समस्यामा सरकार चुप लागेर बस्न नमिल्ने उल्लेख गर्दै उनले भने, ‘किसानले किन ‘मल पाएनौँ’ भनिरहेका छन् ? यो गुनासो तत्काल सम्बोधन गर्न हिजो सम्बन्धित निकायका पदाधिकारीलाई निर्देशन दिएको छु । सम्बन्धित निकायलाई जनस्तरबाट पनि खबरदारी भइरहोस्। समस्या हेरेर बस्ने होइन, समाधान गर्ने हो।’

प्रधानमन्त्री ओलीले मंगलवार मल आपूर्तिको जिम्मेवारी लिएका संस्थाका पदाधिकारीहरूसँगको छलफलमा आफ्नो उत्तरदायित्वबाट नपन्छिन भनेका छन् ।

प्रधानमन्त्री ओलीले आफूलाई अरू कुरा भन्दा पनि मल चाहिएको बताए । उनले भने, ‘मलाई धेरै कुरा भन्दा पनि मल चाहियो क्या यहाँ । के भएर मल आउँदैन ? मैले प्रधानमन्त्री हुने बित्तिकै आइन्दा मलको आपूर्तिमा कमी नहोस् भनेर स्पष्ट निर्देशन दिएको थिएँ।’