रुसी विदेशमन्त्री अलास्का पुगेपनि पुटिन किन बीचमै रोकिए

काठमाडौं– रुस–युक्रेन युद्धविरामका लागि रुसी राष्ट्रपति भ्लादिमिर पुटिन र अमेरिकी राष्ट्रपति डोनाल्ड ट्रम्पको वार्ता हुँदै छ । आज हुने त्यो वार्ताका लागि विशेषस्थान पनि पहिचान गरिसकिएको छ । ट्रम्प र पुटिनबीच अलास्काको एन्करेजस्थित अमेरिकी सेना र वायु सेनाको संयुक्त सैन्य अड्डामा वार्ता हुनेछ । अनि, त्यो वार्ताका लागि रुसी विदेशमन्त्री सर्गेइ लाभ्रोव अलास्का पुगिसकेका छन् ।

लाभ्रोवसँगै अमेरिकाका लागि रुसी राजदूत अलेक्जेन्डर दार्चियभ पनि अलास्का पुगेका छन् । ट्रम्प र पुटिनबीच शुक्रबार बिहान साढे ११ बजे भेट हुनेछ, भने रुसको समयअनुसार चाहिँ राति साढे १० बजे भेट सुरु हुनेछ ।

अन्तर्राष्ट्रिय सञ्चार माध्यमले उनीहरूको बारेमा सामाचारहरू अपडेट गराइरहेका छन् । त्यही क्रममा रुसी समाचार संस्था तासका अनुसार अलास्कामा पुटिन र ट्रम्पबीच हुने वार्तामा दोभाषेमात्रै सहभागी हुनेछन् । त्यसो त यो वार्तामा युक्रेनमा युद्धविराम विषयमा केन्द्रित रहेर छलफल हुनेछ ।

अलास्का जाने रूसी टोलीमा विदेशमन्त्री लाभ्रोव, पुटिनका सहयोगी उशाकोभ, रक्षामन्त्री आन्द्रे बेलाउशोभ, अर्थमन्त्री एन्टोन सिलाउनोभ, विदेशसँगको लगानी र आर्थिक सहकार्यका लागि राष्ट्रपति विशेष प्रतिनिधि र रूसी प्रत्यक्ष लगानी कोषका प्रमुख किरिल दिमित्रिएभ रहेको रुसी सञ्चार माध्यम तासले उल्लेख गरेको छ ।