नौ दिनमा ६ लाख बढीले छोडे काठमाडौं

काठमाडौं । दसैँ सुरु भएलगत्तै राजधानी काठमाडौं उपत्यका छाड्नेको भीड दिनप्रतिदिन बढिरहेको छ। घटस्थापनादेखि आजसम्मको नौ दिनको अवधिमा मात्र ६ लाख ११ हजार ६५७ जना उपत्यकाबाट बाहिरिएका छन्।

उपत्यका ट्राफिक प्रहरी कार्यालयका अनुसार असोज ६ गते घटस्थापना सुरु भएयता विभिन्न नाकाबाट यात्रुहरू गाउँतर्फ निस्किरहेका छन्। पछिल्लो २४ घण्टामा मात्रै ५८ हजार ३९६ जनाले काठमाडौं छाडेका छन्।

प्रहरी उपरीक्षक एवं कार्यालयका प्रवक्ता नरेशराज सुवेदीका अनुसार पछिल्ला दिनमा काठमाडौं छाड्ने यात्रुको संख्यामा तीव्र वृद्धि भए पनि नाकाहरूमा सवारी साधन सामान्य रुपमा सञ्चालन भइरहेको छ।

गत नौ दिनमा उपत्यकाबाट एक लाख १३ हजार ४१५ सवारी साधन बाहिरिएका छन्। यिनै सवारीमार्फत यात्रुहरू विशेषगरी पूर्व, पश्चिम र सुदूरपश्चिमका जिल्ला गएका छन्।

त्यस्तै, उपत्यकाभित्र पनि यात्रु आउने क्रम बढेको छ। अहिलेसम्म ७७ हजार ५४५ सवारीमार्फत ३ लाख १९ हजार १५ जना काठमाडौं भित्रिएका छन्।