१२ घटक मिलेर बनेको नयाँ दल ‘नेपाली कम्युनिष्ट पार्टी’ ले कम्युनिष्ट राजनीतिकलाई कस्तो बनाउला
काठमाडौं– माओवादी र एकीकृत समाजवादी लगायत १२ वटा घटक मिलेर बनेको नयाँ दल ‘नेपाली कम्युनिष्ट पार्टी’ ले सुदृढ र अनुभवी नेतृत्वपङ्क्ति तयार गरेको छ ।
तीनपटक प्रधानमन्त्री बनिसकेका पुष्पकमल दाहाल प्रचण्ड नेकपाका प्रमुख कमाण्डर हुन् । उनलाई पार्टीको संयोजक बनाइएको छ । यस्तै, पूर्वप्रधानमन्त्री माधवकुमार नेपाल ‘सेकेन्डम्यान’ का रुपमा सहसंयोजक बनेका छन् । संयोजक र सहसंयोजकबाहेक अरु पदाधिकारी बनाइएको छैन ।
पार्टीको प्रमुख नेतृत्वमा ३ जना पूर्वप्रधानमन्त्री र ३ पूर्वसभामुख छन् । राष्ट्रियताका मुद्दाहरूमा प्रखर रुपमा प्रस्तुत हुँदै आएका रावल पार्टीमा आउँदा जनमतको एउटा हिस्सा प्रभावित बन्ने आशा नेताहरूले लिएका छन् ।
 |
 |
 |
|---|
पूर्वप्रधानमन्त्री झलनाथ खनाल पनि अन्तिम क्षणमा नेकपामा आबद्ध भए । त्यसो त उनी एमालेमा जान बढी इच्छुक थिए । अघिल्लो राति एमाले अध्यक्ष केपी शर्मा ओलीलाई भेट्न पुगेका खनाल उनीसँग सकारात्मक कुरा गरी भोलिपल्ट नेकपातिर लागे । निर्वाचन, आन्तरिक राजनीति लगायतको विषयमा प्रतिवेदन तयार गर्न गठन गरिने उच्चस्तरीय कार्यदलको नेतृत्व उनलाई दिइने तयारी छ ।
राष्ट्रवादी नेताको छवि बनाएका पूर्वउपप्रधानमन्त्री भीम रावल आज नेकपामा औपचारिक प्रवेश गरे । प्रचण्डले कसिलो अङ्कमाल गर्दै रावललाई स्वागत गरेका थिए । उनको इन्ट्रीले पार्टीपङ्क्ति निकै उत्साहित देखिएको छ ।
पार्टीमा थप तीन पूर्वउपप्रधानमन्त्रीहरू वामदेव गौतम, नारायणकाजी श्रेष्ठ र कृष्णबहादुर महरा पनि छन् । वरीयतामा प्रचण्ड र माधवपछि क्रमशः झलनाथ, वामदेव र नारायणकाजी रहने बुझिएको छ । आज प्रवेश गरेका रावलले छैटौं वरीयता पाउनेछन् ।
Image Source: © https://mulpatra.com
त्यसो त पूर्वउपराष्ट्रपति नन्दबहादुर पुन तथा पूर्वसभामुखत्रय अग्नी सापकोटा, ओनसरी घर्ती र कृष्णबहादुर महरा पनि यही पार्टीमा छन् । उनीहरूको पोजिसन र वरीयताबारे स्पष्ट भएको छैन । सम्भवतः हाइकमाण्डमै समेटिने छन् । यसैगरी महिला कोटाबाट पम्फा भुषाललाई पनि हाइकमाण्डमा ल्याइने सम्भावना छ । महरा भने अहिले जेलमा छन् ।
प्रचण्डले नेतृत्व गरेको भए पनि नेकपाको शीर्ष तहमा पूर्वएमाले नेताहरूको बलियो उपस्थिति छ । माधव, झलनाथ, वामदेव र भीम पूर्वएमाले हुन् । यसअघि एमाले र माओवादी मिलेर बनेको नेकपाको सचिवालयका ९ जनामध्ये ५ जना नेकपामा अटाएका छन् ।
तुलना गर्ने हो भने अहिले एमालेभन्दा नेकपाको नेतृत्वपङ्क्ति बढी वजनदार छ । एमालेमा पूर्वप्रधानमन्त्री अध्यक्ष ओली मात्रै हुन् । पूर्वराष्ट्रपति विद्या भण्डारी एमालेमा ‘कमब्याक’ गर्न इच्छुक भए पनि ओलीले ‘इन्ट्री’ दिएनन् । झलनाथलाई भित्र्याउन पनि चासो देखाएनन् । फलतः एमालेले दुई ‘हेभिवेट’ नेताहरू गुमाएको छ ।