मंसिर ७ गतेदेखि प्रसाईँले मेचीदेखि महाकाली ठप्प पार्ने, परिवर्तन नभएसम्म सडक बस्ने घोषणा

काठमाडौं– राष्ट्र, राष्ट्रियता, धर्म, संस्कृति र नागरिक बचाउ महाअभियानका संयोजक दुर्गा प्रसाईँले आगामी मंसिर ७ गतेदेखि अनिश्चितकालीन आन्दोलन घोषणा गरेका छन् ।

आज (सोमबार) पत्रकार सम्मेलन गर्दै उनले मेचीदेखि महाकाली ठप्प पार्ने दाबी गरे । व्यवस्था परिवर्तन नभएसम्म आन्दोलनमै बस्ने उनको घोषणा रहेको छ ।

व्यवस्था परिवर्तन नभएरसम्म महेन्द्र राजमार्गमा छ्याप्पै बस्ने बताउँदै उनले पूर्वमेचीदेखि पश्चिम महाकालीसम्म दोकान–व्यवसाय बन्द हुने बताए । प्रसाईले नेपाल प्रिमियर लिग (एनपीएल) का कारण आफ्नो आन्दोलन नरोकिने बताए । प्रसाईँले घरमै बसेर एनपीएल हेर्न पनि सुझाव दिए ।

प्रसाईंले भने, ‘व्यवस्था परिवर्तन नभएरसम्म छ्याप्पै महेन्द्र राजमार्गमा बस्ने हो । पूर्वमेचीदेखि पश्चिम महाकालीसम्म दोकान–व्यवसाय बन्द हुन्छ । थपक्क घरमा बस्ने र क्रिकेट हेर्ने । बाटामा नआउने ।’

देशै ठप्प भयो भने क्रिकेट खेलाडीहरु कसरी मैदानमा पुग्छन् भन्ने पत्रकारको प्रश्नमा उनले हचुवा जवाफ दिँदै भने, ‘खेलाडी त कुदेर पनि गइहाल्छन् नि । प्रश्नमाथि प्रश्न नगर्नुस् न ।’