तीनकुने घटनापछि सरकारमाथि प्रश्नै–प्रश्न जवाफ खोई ?
काठमाडौं– गत शुक्रबारको राजावादी प्रदर्शनमा भएको डर लाग्दो घटनापछि सरकारमाथि प्रश्नै–प्रश्न उठ्न थालेको छ । तर सरकारले यसको जवाफ दिन सकेको छैन । तीनकुने घटनामा दुई जनाले ज्यान गुमाएका थिए ।
निहत्था नागरिकविरुद्धको राज्य अपराध गरेको विभिन्न भिडियो सार्वजनिक भएपनि सरकार मौन बसेको छ ।
चैत १५ गते काठमाडौँको तीनकुनेमा भएको राजावादीको प्रदर्शनमा पुगेका राप्रपाका सांसद बुद्धिमान तामाङले आफू त्यहाँबाट भाग्नुपरको समेत बताएका छन् ।
आज बुधबार संसद्को राज्यव्यवस्था तथा सुशासन समितिको बैठकमा घटनाको निष्पक्ष छानबिनको माग गर्दै सांसद तामाङले कार्यक्रमको मञ्चमा दुर्गा प्रसाईं आउनुअघि नै प्रहरीले गोली र टियरग्यास हानेपछि आफु समेत भागेको बताएका थिए । त्यसदिन धेरै जनता मार्ने योजनामा सरकार थियो जस्तो आफुलाई लागेको उनले बताए । ‘तीनकुने घटनाको तुरुन्तै छानबिनको होस । त्यहाँ सरकारले अपराध गरेको छ । प्रदर्शन कार्यक्रम सुरु हुनुअघि नै प्रहरीले अश्रुग्यास प्रहार गरेको छ । मान्छेहरू आउँदै थिए, कार्यक्रम सुरु हुँदै थियो त्यहीबेला मञ्चमा टियरग्यास हानियो ।’ उनले भने ।
सांसद बुद्धिमान तामाङले मात्र होइन । तीनकुने घटनापछि सरकारले प्रदर्शन दवाउन र बिथोल्न खोज्दा दुई जनाको ज्यान भएको केही प्रदर्शनकारी घाइते भएको आवाज उठन थालेको छ ।
राजावादीहरुको प्रदर्शनबाट भएको घटनालगायतका विषयबारे अनुसन्धानका लागि पक्राउ परेका राप्रपाका वरिष्ठ उपाध्यक्ष रवीन्द्र मिश्र र महामन्त्री धवल शमशेर जबरालाई काठमाडौं जिल्ला अदालतले ५ दिनको म्याद दिएको छ । उनीहरुसँगै सय जनाभन्दा बढी पक्राउ गरेका छन् ।
तीनकुनेमा चैत १५ गते राजावादीले हिंसात्मक गतिविधि गरेपछि गणतन्त्र पक्षधर विपक्षी दलहरूले एकजुट भएका छन् ।
संसद्को चौथो ठुलो दल राष्ट्रिय स्वतन्त्र पार्टी(रास्वपा)ले पनि सत्ताधारीको लुटतन्त्रका कारण सडकमा आक्रोश पोखिएको निष्कर्ष निकालेको छ । सोमबार बसेको केन्द्रीय समिति बैठकले राज्यद्वारा लादिएको पीडा र सबै संघर्ष राजनीतिक प्रतिशोधको उपज भएको बताएको छ । तीनकुने घटनामा सरकारमाथि प्रश्न उठेपनि यसको जवाफ अहिलेसम्म आएको छैन ।