निजी मेडिकल कलेजले आवासीय डाक्टरलाई मासिक ४८ हजार ७ सय रूपैयाँ दिन्न भन्न मिल्दैन: स्वास्थ्यमन्त्री

काठमाडौं– स्वास्थ्य तथा जनसंख्यामन्त्री प्रदीप पौडेलले निजी मेडिकल कलेजले आवासीय चिकित्सकलाई मासिक ४८ हजार ७ सय रुपैयाँ दिन्न भन्न नमिल्ने बताएका छन् । स्वास्थ्य मन्त्रालयमा जारी वार्तामा मन्त्री पौडेलले यस्तो बताएका हुन् । उनले आयोगको निर्णय कार्यान्वयन हुने बताए ।

उनले भने,’निजी मेडिकल कलेजले आवासीय चिकित्सकलाई मासिक ४८ हजार ७ सय रुपैया दिन्न भन्न मिल्दैन, आयोगको निर्णय कार्यान्वयन हुन्छ ।’ सरकारी सरह निर्वाह भत्ता माग गर्दै निजी मेडिकल कलेजमा कार्यरत आवासीय चिकित्सकहरुले विरोध प्रदर्शन गर्दै मन्त्रालय घेरेपछि मन्त्री पौडेले नेपाल चिकित्सक संघ र आवासीय चिकित्सकका प्रतिनिधिहरूसँग वार्ता गरेको हो ।

केही हप्ता यता निजी मेडिकल कलेजका आवासीय चिकित्कसहरुलाई सरकारी सरह निर्वाह भत्ता दिनुपर्ने भन्दै माइतीघर मण्डलामा प्रदर्शन गर्र्दै आइरहेका छन् । आन्दोलनरत चिकित्सकहरुले भोलिदेखि देशभरका अस्पतालमा आकस्मिक बाहेकका सेवा ठप्प पार्ने चेतावनी दिएका छन् ।

गत माघ २५ गते बसेको चिकित्सा शिक्षा आयोगको बैठकले आवासीय चिकित्सकलाई सरकारी आठौं तहको तलब सुविधा दिन निजी मेडिकल कलेजलाई निर्देशन दिएको थियो । तर, निजी मेडिकल कलेजले निर्देशन अवज्ञा गर्दै तलब सुविधा दिन आनकानी गरेपछि आन्दोलित भएका छन् ।