युवा संघ महासचिवको तयारीमा सचिव पौडेल

काठमाडौं– नेकपा एमालेको प्रभावशाली भ्रातृ संगठन राष्ट्रिय युवा संघ नेपालको महाधिवेशनको चर्चा सुरु भएको छ । अबको एक महिना आसपासमा संघको नीतिसहित नयाँ नेतृत्व चयन हुँदै छ ।

युवा संघ नेपालको दशौँ राष्ट्रिय महाधिवेशन आगामी जेठ ९ देखि ११ गते कास्कीको पोखरामा हुँदैछ । अहिले संघको नयाँ नेतृत्वमा कस–कसको उम्मेदवार पर्छ भनेर सबैको ध्यान तानिएको छ । युवा संघले महाधिवेशनको नारा ‘शिक्षा, सीप र स्टार्टअप युवाको त्रिशक्ति’ भन्ने मूल नारा तय गरेको छ ।

महाधिवेशन मिति नजिकिएसँगै संघले आन्तरिक तयारीलाई तीव्रता दिएका छ । आकाङ्क्षीहरूले लबिङ समेत बढाउन थालिसकेका छन् । महाधिवेशन मूल आयोजक कमिटी र विभिन्न उपसमितिले आवश्यक तयारी गरिरहेको सचिव निरोज पौडेलले जानकारी दिए । उनका अनुसार महाधिवेशनमा देशभरबाट लगभग १८ सय प्रतिनिधि छनोट हुनेछन् ।

संघले अहिले धमाधम महाधिवेशनका लागि प्रतिनिधि छनोटको काम गरिरहेको र जेठ १ भित्र सबै जिल्लाका प्रतिनिधि केन्द्रीय कार्यालयमा पठाइसक्न निर्देशन दिइसकेको उनले बताए ।

पौडेल महासचिवको तयारीमा

युवा संघको नेतृत्वका लागि आकाङ्क्षीहरूको लर्को लागेको छ । अध्यक्ष थेवेले नदोहोरिने सङ्केत गरेपछि हालका उपाध्यक्षहरू महाराज गुरुङ, कृष्णहरी केसी, प्रकाश गौतम र महासचिव सुमन पुरीले अध्यक्षका लागि आकाङ्क्षा देखाएका छन् ।
महासचिवका लागि निरोज पौडेलसहित राजन थापा, विनय शाह, पर्वत भण्डारी, महेश चौलागाई र खेम शर्माले आकांक्षा राखेका छन् ।

Image Source: © https://mulpatra.com

युवा संघको आगामी महाधिवेशनमा महासचिव पदका लागि सचिव निरोज पौडेलले तयारी गरिरहेको उनीनिटक युवाहरु बताउँछन् । पौडेलले भने यस विषयमा अहिलेसम्म केही बताएका छन् । युवा संघमा लामो समय काम गरेका पौडेललाई युवाका लागि नयाँ योजनाका साथ काम गर्ने सक्ने व्यक्तिका रुपमा हेरिन्छ । पौडेल युवा संघ कोही प्रदेशका इन्चार्ज समेत हुन् ।

पौडेल युवा संघको सचिवमा कार्यरत हुँदा युवाका समस्यालाई राष्ट्रियकरण गर्न माग राख्दै आएका छन् । उनले युवाका लागि सरकारले आवश्यक योजना ल्याउनुपर्छ भनेर आवाज उठाउने व्यक्ति हुन् । युवाले देश निर्माणका लागि नयाँ योजनाका साथ काम गर्नुपर्छ भन्ने पौडेलको मान्यता छ ।