कांग्रेस नेता शशांकले ३ गाडी, सुनको रोलेक्स घडी र २ झोला पैसा घुसवापत खाए

काठमाडौं– नेपाली कांग्रेसका नेता तथा सांसद राजेन्द्र बजगाइँले पूर्वमहामन्त्री डा. शशांक कोइरालाले ३ वटा गाडी, सुनको रोलेक्स घडी र २ झोला पैसा घुस वापत लिएको आरोप लगाएका छन् ।

राजनीतिक नियुक्तिका लागि कोइरालाले यसरी घुस लिएको आरोप बजगाईंले सार्वजनिकरुपमा लगाएका हुन् । जसबारे कोइरालामाथि स्पष्टीकरण सोधिनुपर्ने माग बजगाईंको छ । ‘म चाहँदैनथेँ कि मलाई किया र दुईवटा महिन्द्राजस्ता एसयूभी उपहारहरू, रोलेक्स घडी, नगदले भरिएका डफेल झोलाहरू, तथाकथित घरको जीर्णोद्धारु वा राजनीतिक पदहरूको सौदाबाजीबारे प्रश्न उठाउनुपरोस् । तर याद राख्नुहोस्, स्पष्टीकरण तपाईंलाई सोधिनै पर्नेछ’ सामाजिक सञ्जालमा उनले लेखेका छन् ।

गृहमन्त्री रमेश लेखक विवादमा मुछिएपछि बजगाईंसहित केही नेताहरुले छानबिनका लागि मार्ग प्रशस्त गर्न माग गरेका थिए । तर, उक्त मागलाई लिएर पार्टी बैठकमा बजगाईंसहित राजीनामाको माग गर्ने नेतामाथि स्पष्टीकरण सोध्नुपर्ने प्रस्ताव डा. कोइरालाले राखेका थिए ।

कोइरालाको यस्तो प्रस्ताव बाहिरिएपछि आक्रोशित बनेका बजगाईंले यस्तो कुरा खुलासा गरेका हुन् । बजगाईंको खुलासासँगै पार्टीभित्रको विवाद थप किचलोलिएको छ ।