टिकटकर आयुषकी आमाले छोराबुहारीविरुद्ध गाली बेइज्जतीको मुद्दा हालिन्

काठमाडौं– चर्चित टिकटकर आयुषसिंह ठकुरीकी आमा नानुसिंहले आफ्नै छोराबुहारीविरुद्ध काठमाडौं जिल्ला अदालतमा गाली बेइज्जतीको मुद्दा दायर गरेकी छन् ।

अदालतका सूचना अधिकारी दीपककुमार श्रेष्ठले मुद्दा दायर भएको जानकारी अनलाइनखबरलाई दिए । असार ३० गते आयुष र एलिजेले जिल्ला अदालतमा कानूनी विवाह गरेका थिए ।

उनीहरूले विवाह गर्नुको केही समयअघि गाली बेइज्जतीको मुद्दा अदालतमा दर्ता भएको सूचना अधिकारी श्रेष्ठले जनाए । ‘विवाहको केही समयअघि मुद्दा दायर भएको छ’ उनले भने ।

मुद्दामा नानुसिंहले छोरा आयुष र एलिजेलाई प्रतिवादी बनाएकी छन् । केही समयअघि नानुसिंह र उनका छोराबुहारीको विवाद चर्किएको थियो । उनीहरूको कन्ट्रोभर्सीले त्यतिबेला सामाजिक संजालमा चर्चा पाएको थियो । उनीहरूको पुरानै विवाद अदालतमा पुगेको हो ।