आर्थिक वर्षको पहिलो महिना नै थपियो १४ अर्ब बढी ऋणको भार

काठमाडौं– चालू आर्थिक वर्ष २०८२÷८३ को पहिलो महिनामै १४ अर्ब रुपैयाँभन्दा बढी सार्वजनिक ऋण थपिएको छ । सार्वजनिक ऋण व्यवस्थापन कार्यालयले सार्वजनिक गरेको साउन मसान्तसम्मको विवरण अनुसार, आर्थिक वर्षको सुरुवातमा सार्वजनिक ऋण २६ खर्ब ६९ अर्ब ५७ करोड रुपैयाँ थियो ।

साउन मसान्तसम्ममा यो ऋण १४ अर्ब २ करोडले बढेर कुल २६ खर्ब ८३ अर्ब ६० करोड रुपैयाँ पुगेको छ । यो रकम हालको कुल गार्हस्थ्य उत्पादन (जीडीपी) को ४३.९४ प्रतिशत बराबर हुने कार्यालयले जनाएको छ। सार्वजनिक ऋणमा वैदेशिक ऋणको हिस्सा ५२.२६ प्रतिशत छ भने आन्तरिक ऋणको हिस्सा ४७.७४ प्रतिशत रहेको छ ।

सरकारले चालू वर्षका लागि कुल ५ खर्ब ९५ अर्ब रुपैयाँ बराबरको सार्वजनिक ऋण उठाउने लक्ष्य लिएको छ । उक्त लक्ष्यअनुसार, साउन मसान्तसम्ममा ४४ अर्ब ५७ करोड रुपैयाँ ऋण संकलन भइसकेको छ, जुन वार्षिक लक्ष्यको ७.४८ प्रतिशत हो ।

त्यस्तै, चालू आर्थिक वर्षमा सरकारी ऋणको साँवा र ब्याज तिर्नका लागि कुल ४ खर्ब ११ अर्ब १ करोड रुपैयाँ बजेट छुट्याइएको थियो। त्यसमा साउन मसान्तसम्ममा ३६ अर्ब ६८ करोड रुपैयाँ भुक्तानी भइसकेको छ। यो वार्षिक बजेटको ८.९३ प्रतिशत बराबर हो ।