मुख्यसचिव र सचिवले सिंहदरबारभित्र क्षतिको अनुगमन गरे

काठमाडौं– सिंहदरबारमा आगजनी भएपश्चात् ठप्प भएका मन्त्रालयहरू पुन सुचारु गराउन मुख्य सचिव एकनारायण अर्यालले पहल सुरु गरेका छन् ।

अहिले मुख्यसचिव अर्यालसहित सचिवहरूले सिंहदरबारभित्र भएको क्षतिको अवलोकन र अनुगमन गरिरहेको उच्च स्रोतले बतायो ।

जेनजी आन्दोलनकारीले सिंहदरबारभित्र पसेर वितण्डा मच्चाएका थिए भने यत्रतत्र आगजनी गरेका थिए । आगजनीले भएको क्षतिबारे विस्तृत विवरण आइसकेको छैन । सिंहदरबारभित्रका ठूला भवनहरू क्षतिग्रस्त भए पनि केही मन्त्रालय भवनहरू सुरक्षित रहेको बुझिएको छ ।

मुख्य सचिव अर्यालले हिजो सचिवहरूसँग भर्चुअल मिटिङ गरेका थिए भने आज सबैलाई सिंहदरबारमा बोलाएका छन् । भर्चुअल मिटिङमा हिजो उनले सचिवहरूलाई शुक्रवार आआफ्नो कार्यालयमा गएर सरसफाइ गर्न र सम्भव भएसम्म काम सुचारु गर्न निर्देशन दिएको बुझिएको छ । आज अधिकांश सचिवहरू सिंहदरबार पुगेर मुख्यसचिवसँग अनुगमनमा जुटिरहेका छन् ।

आगजनीका बाबजुद सिंहदरबार पूर्णरुपमा ध्वस्त भने भएको छैन । फल्स सिलिङ, काठका झ्यालढोकाहरु र बाहिर आवरण क्षतिग्रस्त भएका छन् भने मुख्य भित्री संरचना सुरक्षित रहेको आशा गरिएको एक सचिवले बताए ।

‘केही महिनाभित्रमा पुनर्निर्माण गर्न सकिन्छ भन्ने आशा छ,’ ती सचिवले भने, ‘त्यतिञ्जेलसम्मका लागि अस्थायी प्रबन्ध के–कसरी गर्न सकिन्छ भनेर छलफल र गृहकार्य भइरहेको छ ।’

Image Source: © https://mulpatra.com

नयाँ नियुक्त हुने प्रधानमन्त्रीलाई स्वागतका लागि तयार रहन पनि मुख्य सचिवले सचिवहरूलाई निर्देशन दिएका छन् । एक दुई दिनभित्र नयाँ प्रधानमन्त्री नियुक्त हुन सक्ने उनले हिजोको भर्चुअल मिटिङमा बताएका थिए । तर, प्रधानमन्त्रीको कार्यालय कहाँ राख्ने भन्नेबारे निष्कर्षमा नपुगिएको स्रोतको भनाइ छ ।