ओलीले चाहेर पनि संविधान दिवसका दिन निस्कन सकेनन्, प्रहरी प्रमुखले नै रोके पार्टी कार्यालय जान

काठमाडौं – संविधान दिवसको अवसरमा एमालेले असोज ३ गते पार्टी कार्यालयमा भव्य कार्यक्रम गर्ने तयारी गरेको थियो । सो अवसरमा अध्यक्ष एवम् पूर्वप्रधानमन्त्री केपी शर्मा ओलीलाई सार्वजनिक गरिने एमाले नेतृत्वको योजना थियो । तर अन्तिम समयमा नेपाल प्रहरी प्रमुखको चेतावनीकै कारण ओली सार्वजनिक हुने कार्यक्रम रोकिएको खुलेको छ ।

जेनजीको आन्दोलन चर्किदै जाँदा प्रधानमन्त्री ओलीलाई सेनाले उद्दार गरी शिवपुरी ब्यारेकमा राखिएको थियो । उनी केही समयसम्म सेनाको कडा सुरक्षामा रहे पनि असोज २ गते ब्यारेकबाट निस्केर भक्तपुरको गुण्डुस्थित भाडाको घरमा पुगेका थिए । संविधान दिवसकै अवसरमा सार्वजनिक हुने सोचका साथ उनले ब्यारेक छाडेको निकट श्रोतले जनाएका थिए ।

एमाले नेता महेश बस्नेतले संविधान दिवसकै दिन दशौँ हजार कार्यकर्ताबीच ओलीलाई सार्वजनिक गर्ने भन्दै सार्वजनिक अभिव्यक्ति दिएका थिए । उनले संविधान दिवसमा ओली निस्कने निश्चित भएको बताएपछि धेरैमा कौतुहलता उत्पन्न भएको थियो । तर न महेश बस्नेतले भने झै न दशौ हजार कार्यकर्ता आए न ओली नै । ओली नआएपछि कार्यक्रमको अध्यक्षता उपाध्यक्ष अष्टलक्ष्मी शाक्यले गरेकी थिइन् । बाक्लो प्रहरीको उपस्थितिमा गरिएको संविधान दिवसको कार्यक्रममा ओली नआउनु मा प्रहरी प्रमुखले देखाएको सुरक्षा चुनाती प्रमुख रहेको पाइएको छ । प्रहरी प्रमुखले संविधान दिवसमा ओली सार्वजनिक हुन गएमा सुरक्षा जोखिम उच्च हुने भन्दै रोक लगाएका थिए ।

यही कारण अन्तिम क्षणमा ओलीले आफ्नो सार्वजनिक उपस्थिति रोक्नुपरेको हो । स्रोतका अनुसार, ओली स्वयं संविधान दिवसमा बाहिर निस्कने तयारीमा भए पनि प्रहरी प्रमुखले सुरक्षा चुनौती झन् बढ्ने ठहर गरेपछि उनी डराइरहेका थिए ।

यस्तै, बस्नेतले जेनजी युवाहरुलाई आतंककारी संज्ञा दिएपछि आम कार्यकर्ता र सर्वसाधारणमा उनको आलोचना बढेको थियो । सामाजिक सञ्जालमा बढ्दो आक्रोशले बस्नेत मात्र होइन, अध्यक्ष ओलीको छविमाथि पनि असर पारेको देखिन्छ । यसले पनि सुरक्षाको थप संवेदनशीलता सिर्जना गरेको प्रहरीको मूल्याङ्कन छ ।

हाल ओली एमाले कार्यकर्ताको सुरक्षा घेरामा रहेका छन् । यता ओलीको प्रिय पात्रका रुपमा रहेका बस्नेतले पत्रकारलाई समेत धम्की दिएको अभिव्यक्ति सार्वजनिक भएपछि ओली–बस्नेत दुवैप्रति जनआक्रोश बढ्दो क्रममा छ । यसले ओलीको सार्वजनिक उपस्थिति अझै चुनौतीपूर्ण बन्ने देखिएको छ ।

Image Source: © https://mulpatra.com