झिलिमिली बत्तीको कारोबार ३० करोड पुग्ने अनुमान

काठमाडौं– साँझ ढल्दै जाँदा सहरका गल्ली, घरका झ्याल–ढोका, पसलका बार्दली र टोल–टोलका छाना टल्किँदै छन् । लक्ष्मीपूजाको तयारीसँगै घर, कार्यालय, पसल र सडक किनाराहरू बत्तीको रंगीन प्रकाशले झकिझकाउ देखिन थालेका छन् । यति बेला बजारमा झिलिमिली बत्तीको चहलपहल पनि चुलिएको छ ।

अन्धकारलाई उज्यालोले जित्ने, रङ र सांस्कृतिक ऊर्जा भरिएको तिहार पर्व शनिबारदेखि सुरु भइसकेको छ । घरघरमा झिलिमिली बत्ती टाँग्न थालिएको छ भने बजारहरू पनि रङीन बत्तीहरूको चमकले उज्यालो बन्न थालेका छन् ।

झिलिमिली बत्तीको कारोबार यो वर्ष करिब ३० करोड रुपैयाँ बराबरको हुने अनुमान गरिएको छ । तिहारको समयलाई लक्षित गर्दै बजारमा बत्तीको माग बढे पनि अघिल्ला वर्षजस्तो चटारो र उत्साह भने कम देखिएको व्यवसायीहरू बताउँछन् ।

नेपालमा झिलिमिली बत्तीको ठूलो हिस्सा चीनबाट आयात हुन्छ । विशेषगरी तातोपानी नाका प्रयोग हुने गरेकोमा यो पटक सो नाका पूर्ण रूपमा सहज नभएकाले केही व्यापारीहरू अझै सामान ल्याउन सकेका छैनन् । यसले गर्दा बजारमा केही विशेष प्रकारका झिलिमिली बत्तीहरू उपलब्ध नहुन पनि सक्ने अवस्था छ ।

बत्तीहरूको मूल्य सामान्यतया १५० रुपैयाँदेखि २० हजार रुपैयाँसम्म पर्छ । सस्तो मूल्यमा पाउने स्ट्रिङ लाइटदेखि लिएर उच्च गुणस्तरका, रिमोट कन्ट्रोलसहितका डिजाइनर एलईडी लाइटसम्म बजारमा उपलब्ध छन् ।

तिहार मात्र नभई त्यसपछि तुरुन्तै सुरू हुने छठ पर्वको मागलाई ध्यानमा राखी व्यापारीहरूले झिलीमिली बत्तीको स्टक तयार पारेका छन् । झिलिमिली बत्तीको माग कात्तिकको तेस्रो सातासम्म निरन्तर रहन्छ भन्ने अपेक्षा गरिएको छ ।

Image Source: © https://mulpatra.com

तिहारको सिजन व्यापारको सिजन पनि हो । यही मौका छोपी धेरै व्यापारीले फुटपाथमा पनि बत्ती बिक्री गरिरहेका छन् । थोक बजारबाट किनेर साना स्टलमा राखेर बेच्ने प्रवृत्ति विगत केही वर्षयता सामान्यजस्तै बनेको छ । तर, यो वर्ष विगतका तुलनामा फुटपाथ व्यापारमा पनि रौनक कम देखिएको छ ।

नेपाल विद्युत्तीय व्यवसायी महासंघका अनुसार देशभर ४ हजारभन्दा बढी व्यवसायीहरू विद्युत्तीय बत्तीको व्यवसायमा संलग्न छन् । यीनीहरूले वर्षभर विभिन्न सिजनल माग अनुसार कारोबार गर्नेगर्छन् । तर, तिहारको कारोबार सबैभन्दा बढी हुने महासंघले जनाएको छ ।