७ बुँदे हस्ताक्षर गर्दै नेकपामा समाहित हुने भयो भीम रावलको मातृभूमि जागरण अभियान

काठमाडौँ । नेकपा माओवादी केन्द्र र एकिकृत समाजवादी सहितका दल मिलेर बनेको नेपाली कम्युनिस्ट पार्टी (नेकपा) र भीम रावल नेतृत्वको मातृभूमि जागरण अभियान, नेपालबिच ७ बुँदे सहमति पत्रमा हस्ताक्षर गर्दै एकिकरण हुने भएको छ ।

नेकपाको पार्टी कार्यालय पेरिसडाँडामा ७ बुँदे सहमति पत्रमा हस्ताक्षर भएसँगै आज राष्ट्रिय सभागृहमा कार्यक्रम गर्ने भएका छन् ।
राष्ट्रिय सभागृहमा हुने कार्यक्रममा नेकपाका संयोजक प्रचण्ड, माधव नेपाल र भिम रावलले सम्बोधन गर्ने कार्यक्रम रहेको छ ।

नेपाली कम्युनिस्ट पार्टी (नेकपा) र भीम रावल नेतृत्वको मातृभूमि जागरण अभियान, नेपालबिच सहमति गर्दै नेपाल र नेपाली जनताको सर्वोपरी हित, राष्ट्रिय सार्वभौमिकता, एकता, स्वाधीनता, अखण्डता, स्वाभिमान तथा आत्मनिर्णयको अधिकारलाई अक्षुण्ण राख्दै वाह्य हस्तक्षेप र दवावबाट मुक्त राजनीति, राष्ट्रिय अर्थतन्त्र एवं संस्कृतिको मार्गमा अग्रसर रहने प्रतिवद्धता जनाएका छन् ।

समाजवाद एवं सामाजिक न्यायको मान्यतामा आधारित आर्थिक(सामाजिक रुपान्तरण र समृद्धिको लागि कटिबद्ध रहने, आगामी ६ महिना भित्र एकता राष्ट्रिय महाधिवेशन गर्ने ।, पार्टीको सञ्चालन विधान, विधि पद्धति र लोकतान्त्रिक मान्यताको आधारमा गरिने । सामूहिक नेतृत्व र जनवादी केन्द्रीयताको अनुशरण गरिने जस्ता बुँदाहरु समेटिएका छन् ।