स्टार्टअप प्रवद्र्धनका लागि व्यवसाय सम्बद्र्धन सेवा कार्यविधि लागू
काठमाडौं– सरकारले स्टार्टअप प्रवद्र्धनका लागि व्यवसाय सम्बद्र्धन सेवा कार्यविधि लागू गरेको छ ।
नवीन तथा सिर्जनशील सोचमा आधारित स्टार्टअप र उद्यमशीलता माथि केन्द्रित गर्दै उद्योग, वाणिज्य तथा आपूर्ति मन्त्रालयले व्यवसाय सम्बद्र्धन सेवा स्थापना तथा सञ्चालन गर्ने नयाँ कार्यविधि कार्यान्वयनमा ल्याएको हो ।
कात्तिक ३० गते स्वीकृत गरिएको यो कार्यविधि सरकार, विश्वविद्यालय र निजी क्षेत्रबीच सहकार्यमा उद्यम विकासलाई संस्थागत रूपमा अघि बढाउने उद्देश्यले तयार गरिएको हो ।
कार्यविधि अनुसार स्टार्टअप सुरु गर्न इच्छुक नवउद्यमीदेखि तीव्र वृद्धि सम्भावना भएका उद्यमीसम्मका लागि प्रशिक्षण, परामर्श तथा आवश्यक व्यवसायिक सहयोग उद्योग व्यवसाय विकास प्रतिष्ठानमार्फत उपलब्ध गराइनेछ । यी कार्यक्रमहरू प्रतिष्ठानले स्थापना गर्ने विशेष केन्द्रहरूमार्फत सञ्चालन हुने र संघीय, प्रदेश तथा स्थानीय सरकार, शैक्षिक संस्था र निजी क्षेत्रको सहभागिता रहने मन्त्रालयले जनाएको छ ।
सेवा प्रदान गर्ने संस्थाहरूका लागि न्यूनतम पूर्वाधारसमेत तोकिएको छ । कार्यालय कक्ष, तालिम स्थल, बैठक कक्ष, पार्किङ, आवश्यक फर्निचर, द्रुतगति इन्टरनेट र कम्प्युटरसहितका उपकरण अनिवार्य हुनेछन् । योग्य मेन्टर तथा प्राविधिक सहयोग उपलब्ध गराउनुपर्ने मापदण्ड पनि कार्यविधिमा समावेश गरिएको छ ।