कांग्रेसमा जुट्यो सहमति, २६–२९ पुसमा महाधिवेशन हुने

काठमाडौं– नेपाली कांग्रेसको १५औँ महाधिवेशनको मिति तय गर्न नेताहरूले गृहकार्य गरिरहेका छन् । कांग्रेसले आगामी २६ देखि २९ पुसमा महाधिवेशन गर्ने लगभग पक्का भएको छ । यो मिति भोलिको केन्द्रीय समिति बैठकबाट पारित हुने एक नेताले जानकारी दिए ।

आइतबार कार्यवाहक सभापति पूर्णबहादुर खड्काको नेतृत्वमा महामन्त्रीद्वय गगन थापा र विश्वप्रकाश शर्मा, नेता रमेश लेखक र प्रचार विभाग प्रमुख मीन विश्वकर्मासहितको छलफलबाट यस्तो सहमति जुटेको बताइएको छ ।

सोमबारको केन्द्रीय समिति बैठकमा कार्यतालिकासम्बन्धी प्रस्ताव कार्यवाहक सभापति खड्काले नै पेस गर्नेछन् । कार्यवाहक सभापतिको प्रस्ताव छलफलका लागि नभएर निर्णयार्थ पेस हुनेछ ।

यसअघि पार्टीका महामन्त्री थापा र सहमहामन्त्री महेन्द्र यादवको महाधिवेशनका फरक–फरक प्रस्तावमा भने कुनै छलफल हुने छैन । संस्थापनका केन्द्रीय सदस्यहरूको आइतबारको भेलाले यादवको प्रस्तावलाई बहुमतबाट पारित गराउने निष्कर्ष निकालेको थियो । कांग्रेसको २८ असोजदेखि जारी केन्द्रीय समिति बैठक पटक–पटक सर्दै सोमबारका लागि तय गरिएको छ ।