कांग्रेस महाधिवेशनको मितिमा झमेला, आज फेरी बैठक बस्दै

काठमाडौँ । डेढ महिना देखि चल्दै आएको नेपाली कांग्रेसको केन्द्रीय कार्यसमिति बैठक आज फेरी बस्ने भएको छ । जेनजी आन्दोलन पश्चात पार्टी भित्र चलेको विशेष महाधिवेशन कि नियमित महाधिवेशन भन्ने विषय टुङ्गोमा पुर्याउन कांग्रेसले सकेको छैन ।

५४ प्रतिशत प्रतिनिधिले हस्ताक्षर गरि विशेष महाधिवेशनको माग गरेपछि संस्थापन पक्ष त्यसलाई पन्छाउन खोजी रहेको छ । आज दिउँसो पार्टी कार्यालय सानेपामा बस्ने बैठकमा त्यहि महाधिवेशनको कार्यतालिकामा छलफल हुने बताइएको छ ।

जेनजी आन्दोलनमा आक्रमणको शिकार भएपछि देउवाले कार्यबाहक सभापति पूर्ण बहादुर खड्कालाई दिएका थिए । खड्काले पार्टी भित्र उठेको नियमित महाधिवेशन कि विशेष महाधिवेशन को विषयलाई सहमतिमा ल्याउन पटकपटक छलफल गर्दा समेत नसकेपछि पार्टी सभापति शेरबहादुर देउवाले पदाधिकारी र पूर्वपदाधिकारीसँग छलफल गरेका थिए ।

अन्तरिम सरकारले निर्वाचन घोषणा गरिसकेको अवस्थामा आम निर्वाचन अघि महाधिवेशन गर्ने र गर्नुहुँदैन भन्ने पक्ष विभाजित देखिएको छ ।

कांग्रेसमा महाधिवेशनको मिति विवाद भएपछि विशेष महाधिवेशनको माग फिर्ता भए निर्वाचन अघि नियमित महाधिवेशन गर्न सकिनेमा सभापति देउवा सकारात्मक रहेको बुझिएको छ । तत्कालका लागि पुसभित्र नियमित महाधिवेशन सम्पन्न गर्नेगरी नियमित महाधिवेशनको कार्यतालिका ल्याउने शीर्ष सहमति बनेको छ । सोही कारण पनि नियमित महाधिवेशनको अर्को कार्यतालिकामा आज सहमति हुन सक्ने महामन्त्री विश्वप्रकाश शर्माले जनाएका छन् ।