प्रदेश प्रमुख पछि मधेशमा एमालेको सरकार गुम्ने खतरा

काठमाडौँ । सर्वोच्च अदालतले मधेश प्रदेश सरकारका मुख्यमन्त्री सरोजकुमार यादवलाई २४ घण्टा भित्र विश्वासको मत लिन सर्वोच्चले आदेश दिएको छ । सो आदेश अनुसार आज साँझ सम्म यादवले विश्वासको मत लिन सकेनन भने सरकार गठनको नयाँ प्रक्रियामा छिर्ने छ ।

लोसपाबाट नियुक्त मुख्यमन्त्री जितेन्द्र सोनलले कात्तिक २२ गते सदनमै विश्वासको मत लिने बेला राजीनामा दिएका थिए पछि प्रदेश प्रमुख सुमित्रा सुवेदी भण्डारीले ठूलो दलको हैसियतमा संविधानको धारा १६८ को उपधारा ३ बमोजिम नेकपा एमालेका संसदीय दलका नेता सरोजकुमार यादव मुख्यमन्त्री नियुक्त गरेकी थिइन ।

मुख्यमन्त्रीलाई कानुन विपरित र होटलमा सपथ गराएको विवादका कारण सरकारले प्रदेशप्रमुख भण्डारीलाई बर्खास्त गरि नयाँ प्रदेश प्रमुखका रुपमा सुरेन्द्र लाभ कर्णलाई नियुक्त गरेको थियो ।

त्यतिखेरै प्रदेशका ७३ जना सांसदहरूले असंवैधानिक ढंगले यादवको नियुक्ति भएको भनी सर्वोच्चमा रिट दायर गरेका थिए ।

सोही रिट निवेदनमा सोमबार सर्वोच्च अदालतले फैसला गर्दै आज साँझसम्म विश्वासको मत लिन परमादेश दिएको थियो।

सात दलका ७३ सांसद एकातिर र मुख्यमन्त्री चलाइरहेको एमालेसँग जम्मा २४ सिट मात्र रहेको छ । सोही कारण पनि प्रदेश प्रमुख गुमाएको एमालेले मुख्यमन्त्री समेत गुमाउने खतरा बढेको छ ।