पुरानै पोलिसीको भरमा चल्दै बीमा कम्पनी

काठमाडौं– जीवन बीमा कम्पनीहरुको पुरानै व्यवसाय अर्थात् नकिवरण मार्फत संकलन हुने बीमा शुल्क दोहोरो अंकमा वृद्धि भएको छ । कम्पनीहरुले चार महिनामै नकिवरण मार्फत साढे ४९ करोड रुपैयाँ बीमा शुल्क आर्जन गरेका छन् ।

नेपाल बीमा प्राधिकरणबाट प्राप्त चालु आर्थिक वर्ष २०८२–८३ को कात्तिक मसान्तसम्मको तथ्याङ्कले यस्तो देखाएको हो । समिक्षा अवधिमा कम्पनीहरुले ४९ अर्ब ४९ करोड ४५ लाख रुपैयाँ नविकरण बापत बीमा शुल्क आर्जन गरेका छन् ।

यो गत वर्षको तुलनामा १५.९५ प्रतिशत धेरै हो । जबकि, गत आवको सोही अवधिमा आइपुग्दा ४२ अर्ब ६८ करोड ७६ लाख रुपैयाँ मात्रै प्रिमियम कलेक्शन गरेका थिए ।

जीवन बीमा कम्पनीहरु पुरानै व्यवसायमा निर्भर देखिन्छ । कुल व्यापारको झन्डै ८० प्रतिशत (७९.५४ प्रतिशत) हिस्सा नविकरण मार्फत संकलित बीमा शुल्कको छ । यसमा २०.४५ प्रतिशत मात्रै नयाँ व्यवसाय छ ।

समिक्षा अवधिमा कम्पनीहरुले १२ अर्ब ७२ करोड ३९ लाख रुपैयाँ बराबरको नयाँ व्यवसाय अर्थात् प्रथम बीमा शुल्क आर्जन गरेका छन् । ठुलो हिस्सा पुरानै व्यवसायको भएता पनि कम्पनीहरु नयाँ व्यापार बढाउन पनि तातिएका छन् ।

प्राधिकरणका अनुसार पुरानै व्यवसाय अर्थात् नविकरण मार्फत संकलन हुने बीमा शुल्कमा पनि नेपाल लाइफकै वर्चश्व छ । कम्पनीले चार महिनामा १३ अर्ब ३३ करोड ३९ लाख रुपैयाँ बराबरको प्रिमियम नविकरण मार्फत संकलन गरेको छ । जबकि, गत आवको सोही अवधिमा १२ अर्ब ७६ करोड रुपैयाँ संकलन भएको थियो ।

Image Source: © https://mulpatra.com

दोस्रो सूचीमा रहेको नेशनल लाइफले ५ अर्ब ५८ करोड ६३ लाख रुपैयाँ बराबरको बीमा शुल्क आर्जन गरेको छ । यो गत वर्षको तुलनामा भने १४.१६ प्रतिशत धेरै हो । तेस्रो स्थानमा रहेको एलआइसी नेपालले पनि नविकरण बीमा शुल्क ४.१८ प्रतिशत बढाएर ५ अर्ब ५३ करोड ६७ लाख रुपैयाँ कायम भएको छ ।

नविकरण बीमा शुल्क बढाउने मामलामा भने राष्ट्रिय जीवन बीमा कम्पनी शीर्ष सूचीमा छ । कम्पनीको यस्तो बीमा शुल्क २३८.३१ प्रतिशत बढाएर ४ अर्ब ५४ करोड ५१ लाख रुपैयाँ पुर्याएको छ । जबकि, गत आवको पहिलो चार महिनामा १ अर्ब ३४ करोड ३५ लाख रुपैयाँ बराबरको नविकरण बीमा शुल्क संकलन गरेको थियो ।

यस्तै, सिटिजन लाइफको नविकरण बीमा शुल्क पनि २१.७२ प्रतिशत बढेर १ अर्ब ९२ करोड २९ लाख रुपैयाँ पुर्याएको छ । यता, आइएमई लाइफको पनि २०.६३ प्रतिशत बढेर १ अर्ब ३६ करोड ४१ लाख रुपैयाँ कायम भएको छ ।

त्यसैगरि रिलायवल नेपाल २०.०१ प्रतिशत बढेर १ अर्ब ३२ करोड ६१ लाख रुपैयाँ पुगेको छ ।

समिक्षा अवधिमा हिमालयन लाइफको नविकरण बापत संकलन हुने बीमा शुल्क ४ अर्ब ९५ करोड ९२ लाख, सूर्यज्योति लाइफको २ अर्ब ८० करोड ९६ लाख, एशियन लाइफको २ अर्ब ३६ करोड ६६ लाख, सानिमा रिलायन्सको १ अर्ब ७३ करोड ४२ लाख मेट लाइफको १ अर्ब ६२ करोड, प्रभू महालक्ष्मीको १ अर्ब ३७ करोड ७० लाख र सन नेपाल लाइफको १ अर्ब १ करोड २१ लाख रुपैयाँ कायम भएको छ ।