पालो ‘गगन–विश्व युगको’ भन्दै भृकुटीमण्डपतिर जम्मा हुँदै कांग्रेस

काठमाडौं– नेपाली कांग्रेसका महामन्त्रीद्वय गगन थापा र विश्वप्रकाश शर्माको अगुवाइमा आह्वान गरिएको कांग्रेसको विशेष केन्द्रीय महाधिवेशन केहीबेरमा सुरू हुँदैछ ।

कार्यक्रमस्थल भृकुटीमण्डपमा विभिन्न ठाउँबाट बाजागाजासहित जुलुसहरू आउने क्रम जारी छ । कार्यक्रमस्थल अहिले भरिभराउ देखिन थालेको छ । प्रतिनिधिहरूले ‘अब पालो गगन–विश्व युग’ को भन्दै नारा लगाइरहेका छन् ।

उद्घाटनअघि सुन्धारा, रत्नपार्क, शङ्करदेव क्याम्पस, कमलपोखरी, कुपण्डोललगायत क्षेत्रमा नेता, कार्यकर्ता भेला भई ¥याली महाधिवेशन स्थल पुग्दै छन् । प्रदेशगतरूपमा प्रतिनिधिहरूले नाम दर्ता गराइरहेका छन् ।

महाधिवेशनस्थलमा बीपीदेखि गिरिजासम्म पार्टी सभापतिहरूको पूर्णकदको कट आउट राखिएको छ । वर्तमान सभापति शेरबहादुर देउवाको भने छैन ।

असोज २९ गते कांग्रेसका ५४.५८ प्रतिशत महाधिवेशन प्रतिनिधिको हस्ताक्षरसहित विशेष महाधिवेशन मागका साथ केन्द्रीय कार्यालयमा निवेदन दर्ता भएको थियो । विशेष महाधिवेशन पक्षधरले ६० प्रतिशत प्रतिनिधि उतार्ने दाबी गरेका छन् ।