खड्का नेतृत्वको महासंघका मेडिकलभित्रै सिण्डिकेट, दैनिक १० कोटा, कामदारले १० दिनमा मात्र पाउँछन् रिपोर्ट

काठमाडौं– मलेसिया रोजगारीमा जाने कामदारमाथि अनावश्यक आर्थिक भार थप्दै आएका स्वास्थ्य व्यवसायी महासंघका अध्यक्ष कैलाश खड्काले अर्को व्यक्तिगत सिण्डिकेट खडा गरेका छन् । उनको नेतृत्वमा रहेका ३६ मेडिकल व्यवसायीमा समेत कोटा प्रणाली लागू गरेका छन् ।

भने, मलेसिया रोजगारीमा जाने कामदारको मेडिकल गराएको रिपोर्ट समेत १० दिनपछि मात्र लिन थालेका छन् । जसका कारण कतिपय कामदारको आर्थिक भार समेत थपिएको छ । खड्काले आफु नेतृत्व महासंघभित्रै मेडिकलमा समेत कोटा लगाएका छन् ।

मलेसियासँग भएको श्रम सम्झौतामा नेपाल सरकार र नेपालस्थित मलेसियाली दूतावासले नेपाली कामदारको स्वास्थ्य परीक्षण सरकारबाट मान्यतासँगै मेडिकलबाट गर्ने सहमति भएको छ । यसविपरीत खड्काले मलेसिया जाने कामदारको स्वास्थ्य परीक्षण गर्ने सिन्डिकेट लगाउन नपाएपछि उनले कामदारलाई दुख दिन थालेका हुन् ।

महासंघभित्र यतिसम्म विकृति छ । त्यो बाहिर नआउने गरेको एक मेडिकल व्यवसायीले बताए । उनका अनुसार गत महिना सरकारले लागू गरेको कार्यविधिमार्फत बढेको पैसा कायन्र्यवनमा नआएपछि खड्काले महासंघभित्रका व्यवसायीलाई बढी दुख दिन थालेको उनी बताउँछन् । ‘महासंघमा महिनापिच्छे पैसा उठाउँछन् । त्यो पैसा कहाँ जान्छ भन्ने थाहा हुँदै । महासंघभित्र धेरै व्यवसायी बाध्यताले व्यवसाय गरिरहेका छन् । एकतिर सरकारले करोडभन्दा माथि लगानी गर्न लगाएर डुबायो । अर्कोतिर खड्काले दुख दिएर हैरान बनाए ।’ उनले भने ।

मलेसिया जाने कामदार दैनिक ४ सयभन्दा बढी मेडिकलका लागि आउने गरेका छन् । तर जसमा १२–१३ वटा भन्दा बाहेकका मेडिकलले १० भन्दा बढी स्वास्थ्य परिक्षणका लागि कोटा नपाउने गरेको उनको गुनासो छ । त्यसमा पनि प्रतिशत कामदार कमिशन समेत महासंघलाई दिनुपर्ने बाध्यता रहेको उनले बताए ।

खडकाले मलेसिया जाने कामदारको स्वास्थ्य परिक्षण गरेबापत दैनिक हुण्डीमाफर्त पैसा मलेसिया समेत पठाउने गरेको र त्यो पैसा मेडिकलबाट उठाउने गरेको उनको भनाइ छ ।

Image Source: © https://mulpatra.com

गत महिना श्रम, रोजगार तथा सामाजिक सुरक्षा मन्त्रालयले जारी गरेको सूचनाअनुसार स्वास्थ्य परीक्षण गर्ने स्वास्थ्य संस्थाहरूले अब ६ हजार ५ सय मात्र शुल्क लिन पाउने बनाएका थिए । उनले बढेको शुल्क खारेज गरेर पुरानै शुल्क कायम गरेका थिए ।

मन्त्रालयले २०७९ मंसिर १० गते र २०७९ माघ ३० गतेका निर्णयका आधारमा स्वास्थ्य परीक्षण शुल्क अधिकतम ६,५०० रुपैयाँ कायम गरेको जनाएको छ । मन्त्रालयका अनुसार यसअघि केही स्वास्थ्य संस्थाहरूले तोकिएको भन्दा बढी शुल्क लिएको भन्ने गुनासो आएपछि शुल्क दर स्पष्ट गरिएको हो ।

नेपाली कामदार जाने मुख्य रोजगारदाता देशका लागि स्वास्थ्य परीक्षण शुल्क ६ हजार ५ सय तोकिए पनि मलेसियाको मेडिकलमा स्वास्थ्य परीक्षणका नाममा कामदारले १० हजार रुपैयाँ तिर्नुपरेको छ । यसरी ठगी भइरहँदा पनि श्रम मन्त्रालयले ती स्वास्थ्य संस्थामाथि कारबाही गर्न नसकेको मलेसिया जाने कामदारको गुनासो छ ।

विगतमा सिन्डिकेट खडा गरेका ३६ मेडिकल व्यवसायीले माइग्राम्स, बायोमेट्रिक्स, भिएलएन, ओएसजीलगायतका ५ संस्थाबाट मलेसिया जाने कामदारसँग अवैध रूपमा रकम असुल्दै आएका थिए । मलेसिया जाने कामदारले तिरेको १० हजारमध्ये ३ हजार मात्र आफ्नो हातमा पर्ने गरेको स्वास्थ्य व्यवसायीहरु बताउँछन् ।

२०७५ मा तत्कालीन श्रम, रोजगार तथा सामाजिक सुरक्षामन्त्री गोकर्ण विष्टले ३६ मेडिकल संस्था खारेजी गर्ने निर्णय गरेका थिए । त्यतिबेला विष्टले मलेसिया जाने कामदारमारमाथि अनावश्यक सिन्डिकेट लगाएर आर्थिक शोषण गरेको आरोपमा महासंघका अध्यक्ष कैलाश खड्कासहित ३६ मेडिकल व्यवसायीलाई कारबाहीको सिफारिससमेत गरेका थिए । केही व्यवसायी पक्राउ परे भने खड्का राजनीतिक शक्तिको आडमा जोगिएका थिए ।