रवि लामिछानेले भने– इतिहास पढ्न होइन, लेख्न आएका हौँ

काठमाडौं– राष्ट्रिय स्वतन्त्र पार्टी (रास्वपा) का सभापति रवि लामिछानेले इतिहास पढ्न नभई लेख्न आएको दाबी गरेका छन् । जकपुरमा आयोजित सभालाई सम्बोधन गर्दै उनले रास्वपाले यो चुनावपछि इतिहास लेखाउने बताए ।

रास्वपा नेतृत्वको सरकार बन्ने निश्चित भएको हुँदा मेधशको सन्तानलाई पहिलोपटक प्रधानमन्त्री बन्ने अवसर रहेको र पार्टीलाई जिताउन आग्रह गर्दै भने, ‘मधेशसँगै देशको मुहार फेर्ने हो । त्यसका लागि बालेन शाह आएको छ ।’

लामिछानेले शाहले देश बनाउनेमा आफू ढुक्क रहेको बताएका छन् । काठमाडौं महानगरपालिकामा नमुना काम गरेको भन्दै केन्द्र सरकारले एउटा प्रशासकीय अधिकृत पनि दिन नसकेको स्मरण गर्दै भने, ‘अब प्रशासकीय अधिकृत होइन, तिम्रो सत्ता फेर्ने हो ।’

लामिछानेले अब फेर्ने सत्ता जनताको हुनेमा विश्वस्त पारेका छन् । साथै, उनले आफ्नो सरकार बनेपछि पुराना दलका नेताहरूप्रति प्रतिशोध नसाँधिनेसमेत स्पष्ट पारेका छन् ।

‘हाम्रो सरकार ढोका चहार्दैै जाने छैन । हामी उनीहरूजस्तो प्रतिशोधमा उत्रिने पनि छैनौँ,’ लामिछानेले भने ।

तर, यतिका वर्ष सत्तामा बसेर राज्यको ढुकुटी लुटेकाहरूको एक–एक हिसाब भने गरिने चेतावनी दिएका छन् । ‘देश लुटेर कमाएको एक–एक हिसाबचाहिँ गर्नेछौँ,’ उनले भने, ‘बालबालिकालाई टुहुरो बनाएको, मधेशलाई गरिब बनाएको एक–एक हिसाब हुनेछ । किनकि अबकी बार बालेन सरकार ।’

Image Source: © https://mulpatra.com