आजदेखि निर्वाचन लक्षित सभा जुलुस र आमसभाहरु गर्न पाइने

काठमाडौँ । फागुन २१ गतेको प्रतिनिधि सभा सदस्य निर्वाचनका लागि आजदेखि औपचारिक रुपमा प्रचार–प्रसार गर्न पाइने भएको छ । निर्वाचन आयोगले फागुन ४ गतेदेखि १८ गते सम्म निर्वाचन प्रचारप्रसारअन्तर्गत जुलुस, आमसभा, कोणसभा गर्न र सञ्चारमाध्यममा आफ्नो निर्वाचनसम्बन्धी सामग्री प्रकाशन वा प्रसारण गर्न सकिने व्यवस्था गरेको छ ।

राजनीतिक दल तथा उम्मेदवारहरुले आजदेखि यही फागुन १८ गते राति १२ बजेसम्म रानिर्वाचन प्रचार–प्रसार गर्न सक्ने छन् ।
आयोगले राजनीतिक दल तथा उम्मेदवारहरुलाई ६४ बुँदे निर्देशन समेत दिएको छ सोही आचारसंहिता भित्र रहेर दल तथा उम्मेदवारहरुले निर्वाचनमा प्रचार प्रसार गर्न सकिने छ ।

चुनाव प्रसार प्रसारका क्रममा आचारसंहिता उल्लंघनका घटनामा आयोगले शून्य सहनशीलता नीति अवलम्बन गरेको कार्यवाहक प्रमुख निर्वाचन आयुक्त रामप्रसाद भण्डारीले जानकारी दिएका छन् । उल्लंघनकर्तालाई आयोगले स्पष्टीकरण सोध्ने र उल्लंघनको प्रमाण तथा अवस्था हेरेर सचेत, दण्डजरिवाना तथा उम्मेदवारी खारेजीसम्म हुने कानुनी व्यवस्था छ ।

निर्वाचनका समयमा कुनै पनि दल वा उम्मेदवारविरुद्ध तथा निर्वाचनलाई प्रतिकूल असर पार्ने उद्देश्यले सामाजिक सञ्जाल तथा अनलाइन माध्यमबाट एवं संगठितरूपमा निहित राजनीतिक स्वार्थका लागि फैलाइने मिथ्या सूचना, दुष्प्रचार र द्वेषपूर्ण अभिव्यक्ति दिन नपाइने आयोगले उल्लेख गरेको छ ।