देशको आसन, भाषण र शासनमा सुधार गरेरै छाड्छौँ, भोलि निराशा जगाउने अवस्था नहोस: विश्वप्रकाश शर्मा

काठमाडौं– नेपाली कांग्रेसका उपसभापति विश्वप्रकाश शर्माले बदलिएको कांग्रेसले अब देशको आसन, भाषण र शासनमा सुधार गर्ने बताएका छन्।

लमजुङ पुगेका उपसभापति शर्माले कुनै पनि व्यक्ति सत्तामा निरन्तर आसन जमाउने परम्परा भत्काएर आफूहरू आएको बताए।

उनले भने, ‘हामी १÷२÷३÷४ को नीति संविधानमा अंकित गर्नेछौँ। अब उप्रान्त कोही पनि प्रधानमन्त्री र मुख्यमन्त्री दुई पटक भन्दा बढी रहन पाउने छैनन्।’

उनले चुनावी मैदानमा कसैलाई पनि गाली नगर्न आग्रह गरे।

उनले भने, ‘गाली होइन, प्रेम सम्प्रेषण गरौँ, स्वस्थ आलोचना स्वाभाविक हुन्छ, तर आपसलाई गाली गरेर राजनीतिलाई स्वस्थ बनाउन सकिन्नँ चुनाव जित्ने नाममा जे पनि आश्वासन दिएर, समाजमा भोलि निराशा जगाउने कार्य हाम्रा भाषण र घोषणा पत्रहरू मार्फत नगरौँ।’

देशको शासनमा आवश्यक सुधार गर्नको लागि केस्राकेस्रा केलाए जेनजी विद्रोहको भावना अनुसार नै आफूहरू बदलिएर आएको बताए।

Image Source: © https://mulpatra.com