बालेनले घण्टी बजाउँदा रालो निस्केको सम्झिँदै रविले भने– यो क्लिन स्वीपको संकेत हो

काठमाडौं– राष्ट्रिय स्वतन्त्र पार्टी (रास्वपा) सभापति रवि लामिछानेले २१ फागुनको निर्वाचनमा आफ्नो दलले क्लिन स्वीप गर्ने बताएका छन् ।

बुधबार कञ्चनपुर निर्वाचन क्षेत्र नम्बर २ मा आफ्ना विश्वासपात्र दीपक बोहरालाई भोट माग्दै लामिछानेले यस्तो बताएका हुन् ।

‘यहाँ मैले हेरेँ, यहीँबाट रालो खसेको देखेको थिएँ मैले,’ लामिछानेले भने, ‘त्यो भनेको क्लिन स्वीप भनेको हो । त्यो क्लिन स्वीपको संकेत हो ।’

माघ दोस्रो साता रास्वपाका वरिष्ठ नेता बालेन शाह चुनावी अभियानका क्रममा दीपक बोहराकै निर्वाचन क्षेत्र पुगेका थिए । त्यहाँ आयोजित कार्यक्रममा घण्टी बजाउँदा रालोसहित डोरी चुँडिएको थियो ।

यस्तै, लामिछानेले २१ गतेको दिन विशेष भएको पनि बताएका छन् । आफ्ना २१ जना सांसदलाई यसअघि संसदबाट जवरजस्त रूपमा निकालिएको भन्दै लामिछानेले त्यसको जवाफ २१ गते जनताले दिने बताए ।