आणविक शक्ति बढाउने संकल्पसहित किम जोङ उत्तर कोरियाली सत्तारूढ दलको प्रमुख चुनिए

काठमाडौं– उत्तर कोरियाको सत्तारूढ ‘वर्कर्स पार्टी’ ले किम जोङ उनलाई पुनः आफ्नो महासचिव चयन गरेको छ। आइतबार सम्पन्न पार्टी महाधिवेशनले उनलाई पुनः महासचिवमा सर्वसम्मत चयन गरेको घोषणा गरेको हो ।

सरकारी समाचार संस्था ‘केसीएनए’का अनुसार किमको नेतृत्वमा उत्तर कोरियाले आणविक शक्तिलाई केन्द्रमा राखेर आफ्नो युद्ध प्रतिरोध क्षमतामा आमुल सुधार गरेको छ ।

लामो समयदेखि अन्तर्राष्ट्रिय प्रतिबन्धहरू खेपिरहेको भए तापनि उत्तर कोरियाले आफ्नो आणविक क्षमता विस्तार गर्ने क्रमलाई निरन्तरता दिएको छ र प्रतिबन्धित अन्तरमहाद्वीपीय क्षेप्यास्त्रहरूको नियमित परीक्षण गर्दै आएको छ। यद्यपि, त्यहाँको शासन व्यवस्था अत्यन्त गोप्य रहने भएकाले सेनाले कति प्रगति गरेको छ भन्ने मूल्याङ्कन गर्न कठिन छ।

सन् १९४० को दशकदेखि उत्तर कोरियामा किम परिवारकै तानाशाही शासन चल्दै आएको छ।सन् २०११ मा आफ्ना पिताको मृत्युपछि सत्ता सम्हालेका किमले आणविक हतियार कार्यक्रममा ठूलो लगानी गरेका छन्। यसले प्योङयाङलाई पश्चिमा देशहरू, विशेष गरी अमेरिकाका लागि निकै ठूलो चुनौती बनाएको छ।

चौथो दिनमा प्रवेश गरेको यस महाधिवेशनमा किमले देशको हतियार कार्यक्रमको आगामी चरणको घोषणा गर्ने अपेक्षा गरिएको छ। महाधिवेशन सुरु हुनुअघि उत्तर कोरियाले आणविक क्षमता भएका रकेट लन्चरहरूको प्रदर्शनी गरेको थियो।

पछिल्लो दशकमा हरेक पाँच वर्षमा एक पटक आयोजना हुने यो महाधिवेशन फेब्रुअरी १९ बाट सुरु भएको हो।

Image Source: © https://mulpatra.com

केसीएनएका अनुसार करिब ५,००० पार्टी सदस्यहरूको उपस्थिति रहेको यस महाधिवेशनले उत्तर कोरियाको राजनीतिक संरचनालाई नजिकबाट नियाल्ने दुर्लभ अवसर प्रदान गर्दछ, जुन बाह्य विश्वका लागि अझै पनि रहस्यमय छ। यी बैठकहरूलाई सबैभन्दा महत्त्वपूर्ण राजनीतिक घटना मानिन्छ, जसले विदेश नीतिदेखि आणविक महत्त्वाकांक्षासम्म देशको प्राथमिकता कता छ भन्ने संकेत दिन्छ।

किम नेतृत्वको माथिल्लो तहमै रहे तापनि सन् २०२१ को बैठकपछि पार्टी महाधिवेशनको ‘प्रेसिडियम’ वा कार्यकारी समितिमा हेरफेर गरिएको छ। सरकारी सञ्चारमाध्यमका अनुसार ३९ सदस्यमध्ये आधाभन्दा बढी सदस्य फेरिएका छन्।

गत हप्ता आफ्नो उद्घाटन भाषणमा किमले देशको अर्थतन्त्र र जनताको जीवनस्तर सुधार्ने वाचा गरेका थिए, जसलाई उनले भारी र तत्काल पूरा गर्नुपर्ने ऐतिहासिक कार्यको रूपमा वर्णन गरे।

यसै महिनाको सुरुमा दक्षिण कोरियाको गुप्तचर निकायले किमकी छोरी जु एलाई आफ्नो उत्तराधिकारीका रूपमा रोजेको बताएको थियो। करिब १३ वर्षकी मानिने किम जु ए पछिल्लो समय सरकारी कार्यक्रमहरूमा सक्रिय देखिन थालेकी छिन्। उनी आफ्ना पितासँगै क्षेप्यास्त्र निरीक्षण गर्नेदेखि बेइजिङको सैन्य परेडमा समेत सहभागी भएकी थिइन्।