इजरायली प्रधानमन्त्री नेतान्याहुको कठिन रात हुनेगरी इरानको ठुलो क्षेप्यास्त्र हमला

काठमाडौं– इजरायलमा इरानले गएराति सबैभन्दा शक्तिशाली हमला गरेको छ । दक्षिणी शहर अरदमा इरानले गरेको क्षेप्यास्त्र हमलामा ठूलो क्षति पुगेको इजरायली आपतकालीन सेवाले जनाएको छ ।

मागेन डेभिड एडोम नामको आपतकालीन सेवाका अनुसार आक्रमणमा घाइते भएका ८८ जनालाई अस्पताल भर्ना गरिएको छ । जसमध्ये १० जनाको अवस्था गम्भीर छ भने १९ जना मध्यम र ५५ जना सामान्य घाइते भएको बीबीसीले जनाएको छ ।

यो आक्रमणपछि इजरायली प्रधानमन्त्री बेन्जामिन नेतान्याहुले अरदका मेयरसँग टेलिफोन कुराकानी गरेका छन् । उनले यो हमलालाई ‘असाध्यै कठिन साँझ’ भएको बताएका छन् । नेतान्याहुले सामाजिक सञ्जाल एक्समा लेखेका छन्, ‘हाम्रो भविष्यका लागि चलिरहेको यो अभियानमा आजको साँझ असाध्यै कठिन भयो । मैले मेरो कार्यालयका महानिर्देशकलाई सबै सरकारी मन्त्रालयसँग मिलेर हरेक आवश्यक सहायता उपलब्ध गराउन निर्देशन दिएको छु ।’

नेतान्याहुले अगाडि भनेका छन्, ‘म यस समयमा घटनास्थलमा काम गरिरहेका आपतकालीन र उद्दारकर्मीको मनोबल बढाउँछु र सबैलाई ‘होम फ्रन्ट कमान्ड’को निर्देशन पालना गर्न अनुरोध गर्छु ।’

नेतान्याहुले सबै मोर्चामा दुश्मनमाथि हमला जारी राख्नेसमेत बताएका छन् ।