अर्थमन्त्रीको सम्पत्ति विवरणः आधा केजी सुन, ४ ठाउँमा घर तथा अपार्टमेन्ट अन्य कति ?

काठमाडौं । सरकारले मन्त्रिपरिषद्का सदस्यहरूको सम्पत्ति विवरण सार्वजनिक गरेको छ । आज आइतबार सरकारले सार्वजनिक गरेको सम्पत्ति विवरण अनुसार अर्थमन्त्री डा. स्वर्णिम वाग्लेसँग आधा केजी बढी ४५ तोला सुन रहेको देखाएका छन् । उनले आफ्नो सम्पत्ति विवरण सार्वजनिक गर्दै चार वटा घर तथा अपार्टमेन्ट रहेको खुलाएका छन्।

सार्वजनिक विवरणअनुसार ललितपुरको सानेपामा करिब २ करोड रुपैयाँ मूल्यको अपार्टमेन्ट, ललितपुरमै ५ करोड रुपैयाँको घर, काभ्रेमा ३ करोड ७५ लाख रुपैयाँको अपार्टमेन्ट र तनहुँमा करिब २ करोड रुपैयाँको घर रहेको उल्लेख छ।

त्यस्तै, वाग्लेले आफूसँग ४५ तोला सुन रहेको जनाएका छन्। सेयर लगानीतर्फ सानिमा मिडल तमोर हाइड्रोमा ७१ हजार ९३ कित्ता र सांग्रिला विकास बैंकमा २५ हजार ७६२ कित्ता प्रमोटर सेयर रहेको उल्लेख गरेका छन्।

सम्पत्तिको स्रोतका रूपमा उनले अन्तर्राष्ट्रिय रोजगारी, निजी निवास बिक्री, बैंक ऋण तथा व्यक्तिगत सापटीलाई उल्लेख गरेका छन्। विवरणअनुसार उनको बैंक खातामा १ करोड ९० लाख रुपैयाँ मौज्दात रहेको छ।

यसैगरी, नेशनल फन्ड म्यानेज्मेन्ट लिमिटेडमा ९० लाख रुपैयाँ, ठूलो लखोला आयोजनामा ६० लाख रुपैयाँ र अपर मादी हाइड्रोमा ३ करोड रुपैयाँ लगानी रहेको विवरणमा उल्लेख छ। साथै, ९४ लाख रुपैयाँ मूल्यको गाडी पनि रहेको उनले जनाएका छन्।

ऋणतर्फ, ग्लोबल आइएमई बैंकबाट १ करोड ५ लाख रुपैयाँ र व्यक्तिगत सापटीमार्फत २ करोड ५० लाख रुपैयाँ दायित्व रहेको छ। उनले राष्ट्रिय वाणिज्य बैंकबाट ३८ लाख र स्ट्यान्डर्ड चार्टर्ड बैंकबाट ७५ लाख रुपैयाँ ऋण लिएर भुक्तानी गरिसकेको पनि उल्लेख गरेका छन्।

Image Source: © https://mulpatra.com