इरानमा इन्टरनेट प्रतिबन्धका कारण १ करोडको काम अवरोध, ४० लाख रोजगारी गुम्दै

काठमाडौं– अमेरिका र इजरायलसँग जारी युद्धका अन्य असरहरूसँगै इरानमा इन्टरनेट प्रतिबन्धका कारण लाखौँ मानिस प्रभावित भएका छन् ।

इरानमा करिब एक करोड मानिसहरू आफ्नो कामको लागि अवरोधरहित इन्टरनेट सेवामा निर्भर छन्। इरानी मिडियाको अनुमानअनुसार आर्थिक नोक्सानको स्तर योभन्दा निकै बढी हुन सक्छ ।

इरानका वरिष्ठ मन्त्रीहरूले इन्टरनेट प्रतिबन्धका कारण नागरिकहरूको रोजगारी गुम्ने र यसको सामाजिक तथा आर्थिक असरबारे चेतावनी दिएका छन्।

इन्टरनेटको पहुँच भेदभावपूर्ण भएको भन्दै गम्भीर आपत्ति पनि जनाइएको छ, तर यसका साथसाथै सरकारकै वरिष्ठ अधिकारीहरूले विशेष परिस्थितिका कारण इन्टरनेट पुनर्बहाली गर्न नसकिने दाबी पनि गरिरहेका छन्।

सन्तुलित दृष्टिकोण राख्ने न्युज वेबसाइट अस्र–ए इरानले एउटा अनौपचारिक अनुमानलाई उद्धृत गरेको छ, जसअनुसार युद्ध र इन्टरनेट बन्दको संयुक्त असरका कारण ४० लाखसम्म रोजगारी गुमेका छन् वा प्रभावित भएका छन्।

सोही रिपोर्टमा पूर्वाधार र उद्योगहरूमा ठूलो मात्रामा भएको नोक्सानको दाबी पनि उल्लेख छ, यद्यपि यो कुन कार्यपद्धति (मेथडोलोजी) को आधारमा भनिएको हो भन्ने खुलाइएको छैन।

Image Source: © https://mulpatra.com

इरानको डिजिटल अर्थतन्त्रमा भएको अनुमानित नोक्सान २,१५० ट्रिलियन रियाल (१.६९ अर्ब डलर) सम्म पुगिसकेको छ।

दैनिक हुने नोक्सानको मूल्याङ्कनअनुसार डिजिटल कोरलाई ५ ट्रिलियन रियाल (३.९ मिलियन डलर) को नोक्सान भएको छ र सम्पूर्ण अर्थतन्त्रलाई ५० ट्रिलियन रियाल (३९.२ मिलियन डलर) को। घरेलु प्लेटफर्महरूले मागलाई धान्न नसकेको बताइएको छ, जसले क्षमताको गम्भीर अभावतर्फ सङ्केत गर्छ।