मलेसिया जाने कामदारसँग ३ लाख असुल्ने ग्रान्ड स्विट जब म्यानपावरका कर्मचारी पक्राउ

काठमाडौं । मलेसिया जाने नेपाली कामदारसँग गैरकानुनी रूपमा ३ लाख रुपैयाँ असुल्न खोजेको आरोपमा कोटेश्वरस्थित ग्रान्ड स्विट जब म्यानपावरका एक कर्मचारी पक्राउ परेका छन् ।

सेक्युरिटी गार्डका लागि मलेसिया जान लागेका सप्तरीका अजय कुमार यादवसँग ३ लाख असुल्न खोजेपछि श्रम मन्त्रालय र प्रहरीको नेतृत्वमा म्यानपावरका कर्मचारी पक्राउ परेका हुन् ।

सेक्युरिटी गार्डका लागि मलेसिया जान सुरुमा फ्रि भिसा भनेपनि भिसा लागिसकेपछि ३ लाख १० मागेको आरोप म्यानपावर माथि लागेको छ । झापा सरकारको ‘फ्रि भिसा, फ्रि टिकट’ नीतिअनुसार बढीमा १० हजार रुपैयाँ मात्र खर्च लाग्नुपर्ने भए पनि म्यानपावर कम्पनीले उनीसँग ३ लाख १० हजार रुपैयाँ मागेको थियो ।

पीडित यादवले ७० हजार रुपैयाँ पहिल्यै नै बुझाइसके पनि बाँकी २ लाख ३० हजार रुपैयाँ नतिरेसम्म राहदानी, श्रम स्वीकृति र हवाई टिकट नदिने भन्दै म्यानपावरले कागजात रोकेको थियो । शनिबार बिहान म्यानपावरका कर्मचारीले यादवलाई तीनकुनेस्थित गैरीगाउँमा पैसा लिएर आउन फोनमार्फत बोलाए पछि उनले मत्रालयमा सम्पर्क गरेका थिए ।

मन्त्रालयले तत्काल कारवाही अघि बढाएपछि म्यानपावरका कर्मचारीलाई तीनकुनेबाट पक्राउ गर्न सफल भएको हो । प्रहरीले पक्राउ परेका कर्मचारीलाई काठमाडौं उपत्यका अपराध अनुसन्धान कार्यालय पठाएको छ । उनीसँगबाट ४ वटा राहदानी, हवाई टिकट तथा अन्य कागजात बरामद भएको प्रहरीले जनाएको छ ।

प्रहरीसमक्ष प्रारम्भिक बयानका क्रममा ती कर्मचारीले ‘फ्रि भिसा, फ्रि टिकट’ व्यवस्था लागू भएको अवस्थामा पनि ३ लाख रुपैयाँ मागिएको स्वीकार गरेका थिए ।

Image Source: © https://mulpatra.com

श्रम मन्त्रालयले वैदेशिक रोजगारीमा जाँदा समस्या परेमा मन्त्रालय वा सम्बन्धित निकायमा सम्पर्क गर्न आग्रह गरेको छ । पक्राउ परेका कर्मचारीमाथि थप अनुसन्धान भइरहेको प्रहरीले जनाएको छ ।