कांग्रेस–एमाले भ्रष्टाचार र आ–आफ्ना कर्तुत ढाकछोप गर्न सत्तामा उक्लिएको प्रसाईको आरोप

काठमाडौं– कांग्रेस–एमाले मिलेर अब साँच्चै केही गर्छन् भन्ने आश गर्नु बेकार हुने नागरिक बचाउ महाअभियानका संयोजक तथा मेडिकल व्यवसायी दुर्गा प्रसाईको आरोप छ। आ–आफ्ना कर्तुत ढाकछोप गर्न र आफूहरूलाई जोगाउन मात्र यी दुई दल मिलेको प्रसाईको दाबी छ ।

भोलिका आम मानिसको आशा निराशामा बदलिने र आम नागरिकले अझ कष्टकार जिवन जिउने दिन आउने प्रसाईले बताए । अहिलेको सत्ता सञ्चालनको प्रणालीलाई हटाएपछि, त्यो निकम्मा प्रणालीमा विश्वास गर्ने पात्रहरूलाई तह लगाउने सजिलो हुने उनको विश्वास छ। ‘राज्यले विकासका लागि हरेक वर्ष छुट्ट्याउने पैसा (पुँजीगत बजेट) खर्च हुँदैन् । कैयौं वर्षदेखि हरेक अर्थमन्त्रीले कुर्सीमा बसेका दिन म त्यसलाई ठीक गर्छु भन्दै आएका छन्। त्यही भए नयाँ व्यवस्था आवश्यक छ ।’ उनले भने । राजनीतिक दलहरूलाई चाहिने आर्थिक स्रोतको व्यवस्थापन कसरी गर्ने थाहा नभएको उनी बताउँछन् ।

शासन प्रणाली दण्ड, पुरस्कार र जबाफदेहीता हुने खालको हुनुपर्छ । सरकारको चुस्त र प्रभावकारी सञ्चालन सुनिश्चित गर्न राजनीतिक दलको आवश्यकता छ । गुटका आधारमा होइन, क्षमता र इमानका आधारमा सरकारको नेतृत्व हुनुपर्ने प्रसाई बताउँछन् । अहिले राजनीतिक दलमा त्यस्तो नदेखिएपछि जनतामा निराशा फैलिएको हो । यसका लागि नेपालमा वैकल्पिक शक्ति चाहिन्छ भन्ने जनतामा भएको उनको दाबी छ ।

दल र नेताहरूको आचरण, इमान, क्षमता र कार्यशैली प्रमुख रूपमा अहिले कमाउन र भ्रष्टाचार गर्नेतिर मात्र छ। यसबाट आगामी दिनमा जनताले नयाँ शक्तिका लागि केही शिक्षा सिक्नुपर्ने उनको बुझाइ छ । प्रसाईले सबै नेपालीले एक पटक पार्टी र दलभन्दा माथि उठेर देशका लागि सोच्ने बेला आएको पनि औल्याएका छन् ।