प्रसाईका एजेन्डामा सहानुभूति बटुल्न तछाड मछाड गर्दै कांग्रेस–एमाले

काठमाडौं–दुई बर्षयता मेडिकल व्यवसायी तथा नागरिक बचाउ महाअभियानका संयोजक दुर्गा प्रसाईले उठाएका एजेन्टमा अहिले सरकार र संसद्मा बहस सुरु भएको छ । प्रसाईले वैदेशिक रोजगारीका, आन्तरिक श्रम बजारका, कृषिका, व्यापारीका र नीजि क्षेत्रका समस्या उठाउँदै आएका छन् । साथै प्रसाईले मारवाडी, तस्करी, व्यापारी र भ्रष्टाचारी नेताहरुको भण्डाफोर गर्दै आएका छन् । उनले बैंक, सहकारी, लघुवित्त संस्था पीडितका पक्षमा दुई बर्षयता जोडदार आवाज र उनीहरुको बचाउका लागि सडक आन्दोलन गरिरहेका छन् ।

अहिले कांग्रेस–एमाले नेतृत्वमा बनेको सरकारले उनै प्रसाईले उठाएका एजेन्डाबाट सहानुभूति बटुल्न लागि परेको पाइन्छ । दुवै पार्टीले आगामी निर्वाचनमा मुख्य एजेन्डा पनि उनै प्रसाईले उठाएका विषय बनाउन खोजिरहेको प्रष्ट देखिन्छ । कांग्रेस एमालेले मात्र होइन, अन्य पार्टीले समेत प्रसाईका एजेन्डा केन्द्रीत राजनीतिक गर्ने तयारीमा छन् ।

प्रसाईले उठाएका एजेन्डा केन्द्रीत भएर नेपाली कांग्रेसका महामन्त्री विश्वप्रकाश शर्माले हिजो मात्र सासंदमा बोलेका छन् । प्रतिनिधिसभा बैठकको विशेष समयमा बोल्दै शर्माले हवाइ दुर्घटनादेखि बूढीगण्डकी हुँदै भ्रष्टाचारका फाइल खोल्ने विषयमा सरकार कठोर हुनुपर्ने माग राखे । अव्यवस्थित बसोबासी, सुकुम्बासी र भूमिहीनको समस्या समाधान गर्न काम अघि बढाउन पनि उनले सरकारको ध्यानकर्षण गराएका थिए ।

यस्तै, शर्माले भुटानी शरणार्थी र गिरीबन्धु टि–स्टेटका फाइल कानुनअनुसार अनुसन्धान हुनुपर्ने माग राखे । हिजो सासंदमा शर्माले उठाएका विषयमा गत साता मात्र नागरिक बचाउ महाअभियानका संयोजक दुर्गा प्रसाईले पत्रकार सम्मेलन गरेर सार्वजनिक गरेका थिए ।

प्रसाईले दुई बर्षयता उठाएका केही महत्वपुर्ण विषय राष्ट्र बैंकले चालु आर्थिक बर्षको मौद्रिक नीतिमा समेत समेटेको छ । एमालेका उपाध्यक्ष तथा अर्थमन्त्री विष्णु पौडेलको निर्देशनमा राष्ट्र बैंकका गर्भनर महाप्रसाद अधिकारीले प्रसाईले उठाएका सहकारी, बैंक र लघुवित्त पीडितका समस्या मौद्रिक नीतिमा समेटेको पाइन्छ ।

प्रसाईका कारण बैंक, सहकारी र लघुवित्त संस्थाका ऋणलाई कालोसूचिमा नराख्ने र तत्काल उनीहरुको धितो निलाम नगर्ने राष्ट्र बैंकले मौद्रिक नीतिमा ल्याएको हो । साथै, मिटरब्याजी, बैंक, सहकारी र अन्य आर्थिक पीडितका हकमा पनि प्रसाईको आन्दोलनले ठुलो राहत मिलेको छ । उनकै आन्दोलनका कारण उनीहरुले मौद्रिक नीतिमा केही सुविधा र छुट समेत पाएका छन् ।

Image Source: © https://mulpatra.com

नेकपा एमालेका अध्यक्ष तथा प्रधानमन्त्री केपी ओलीले समेत प्रसाईका एजेन्डालाई आत्मासाथ गर्दै सार्वजनिक कार्यक्रममा भाषण गरिरहेका छन् । प्रसाईले जस्तै ओलीले पनि सहकारी, बैंक, लघुवित्त र मिटरब्याजीका विषयलाई प्रथामिकतामा राखेका छन् । एक बर्ष अघिसम्म यी विषयमा कुनैपनि राजनीतिक दलले मुख खोल्न सकेका थिएन । तर पछिल्लो समय प्रसाईले उठाएका एजेन्डामा सबै राजनीतिक दलको नजर परेको छ । अहिले उनकै एजेन्डामा कांग्रेस–एमाले नै तछाड–मछाड गरिरहेका छन् ।