प्रसाईको नयाँ मेडिकल कलेजलाई थोरै कोटा दिन चिकित्सा आयोगलाई ओलीको निर्देशन

काठमाडौं– नेकपा एमालेका अध्यक्ष तथा प्रधानमन्त्री केपी ओली गृहजिल्ला झापा हो । उनै गृहजिल्लामा गत जेठमा बीएण्डसी अस्पताललाई मेडिकल कलेज सञ्चालनका लागि अनुमति दिन सर्वोच्च अदालतले आदेश दिएको थियो । गत १४ जेठमा सर्वोच्चले १५ दिनभित्र सम्बन्धन काठमाडौं विश्वविद्यालय र चिकित्सा शिक्षा आयोगका नाममा आदेश जारी गरेको थियो ।

सोहीअनुसार आयोगले दुर्गा प्रसाईं सञ्चालक रहेको बीएण्डसी अस्पताललाई मेडिकल कलेज सञ्चालन तयारीको अनुगमन गरिसकेको छ । तर, केहीदिन अगाडी प्रधानमन्त्री ओलीले चिकित्सा शिक्षा आयोगका कर्मचारीलाई बोलाएर प्रसाईको मेडिकल कलेजलाई थोरै कोटा दिन सुझाव दिएको पाइएको छ । आयोगका एक उच्च अधिकारीका अनुसार प्रधानमन्त्रीले आफनै गृहजिल्लाको मेडिकल कलेजलाई थोरै कोटा दिन निर्देशन दिनुभएको छ ।

प्रधानमन्त्रीले प्रसाईको कलेजलाई दिने कोटा भरसक घटाउनु भन्ने आसय राख्नुभएको उनले बताए । ‘प्रसाईको कलेजले यसपटक मात्र संम्बोधन पाएको हो । उहाँको कलेजलाई धेरै कोटा लिनुपर्ने हो । तर प्रधानमन्त्रीले यस्तो भनेका छन् । आयोगले नियम बाहिर काम नगर्नुपर्ने हो ।’ उनले भने ।

यस विषयमा आफुलाई थाहा नभएको चिकित्सा शिक्षा आयोगकी सूचना अधिकारी सरिता कुमारी खतिवडाले जानकारी दिइन् । चिकित्सा शिक्षा आयोगको आफै नियम छ । सोहीअनुसार कोटा वितरण र निर्धारण हुने उनको भनाइ छ ।

उता प्रसाईले पनि यस विषयमा आफुलाई जानकारी नभएको र चिकित्सा शिक्षा आयोगले निष्पक्ष रुपममा काम गर्नेमा आफु ढुक्क भएको जानकारी दिए ।

बीएण्डसीले २०६४ सालमा शिक्षा मन्त्रालयबाट आशयपत्र लिई पूर्वाधार निर्माणलगायत मेडिकल कलेज सञ्चालनको पूर्वतयारीको काम गर्दै आएको थियो । ऐनको त्यही व्यवस्थाअनुसार सम्बन्धन पाउन बीएन्डसीले २०७६ सालमा आयोगमा निवेदन दिएको थियो। तर त्यससमयमा आयोगले आशयपत्र नवीकरण नभएको कारण देखाउँदै सम्बन्धन स्वीकृति दिन अस्वीकार गरेको थियो । सरकारले सबै प्रक्रिया पुगेपनि प्रसाईलाई समयमा कलेज सञ्चालनको अनुमति नदिँदा उनको अबौं लगानी डुबेको थियो ।

परमादेशपछि काठमाडौं विश्वविद्यालय कार्यकारी समितिको २७ जेठको बैठकले चिकित्सा शिक्षा आयोगलाई सम्बन्धन दिन सिफारिससहितको पत्र पठाएको थियो ।