माघमा पाठेघरको मुखको क्यान्सरविरुद्ध खोप लगाइने

काठमाडौं । सरकारले विद्यालय र विद्यालय बाहिर रहेका किशोरीलाई पाठेघरको मुखको क्यान्सरविरुद्ध (एचपिभी) खोप अभियान सञ्चालन गर्ने भएको छ ।

पाठेघरको मुखको क्यान्सर न्यूनीकरण गर्ने उद्देश्यले बालबालिकालाई ह्युमन प्यामिलोमा भाइरस (एचपीभी) विरुद्धको खोप निःशुल्क दिने भएको हो ।

विद्यालयका कक्षा ६ देखि १० सम्म र विद्यालय बाहिर रहेका १० देखि १४ वर्षसम्मका बालिका लक्षित गरी माघदेखि खोप अभियान सञ्चालन गर्ने लागिएको हो ।

१० देखि १४ वर्षसम्मका बालिका करिब १६ लाख ८८ हजार छन् । यसअघि सरकारले सात संघीय अस्पतालमा नमूनाका रुपमा १४ वर्ष उमेरका करिब १० हजार बालिकाहरुलाई खोप दिइएको थियो ।

माघदेखि हरेक विद्यालयमा गएर खोप दिने र विद्यालय बाहिर रहेका बालिकाहरुलाई पालिकाको वडा स्वास्थ्य शाखासम्म पुगेर खोप दिने कार्यक्रम रहेको र अर्को वर्षदेखि एचपीभी खोप नियमित खोप कार्यक्रममा समावेश गरिने मन्त्रालयले जनाएको छ ।