माटोको उर्वरा शक्ति बढाउँदै कागेश्वरी मनोहरा नगरपालिका
काठमाडौं । अग्र्यानिक खेतीलाई प्रोत्साहन गर्दै माटोलाई उर्बर बनाइरहन कागेश्वरी मनोहरा नगरपालिकाले निशुल्क माटो परिक्षण गर्ने भएको छ । नगरपालिकाले एक सूचना जारी गर्दै निशुल्क माटो परिक्षण गर्ने र अम्लियपन देखिएका माटोहरुमा हाल्ने गरि ७५ प्रतिशत अनुदानमा कृषि चुन समेत वितरण गर्ने योजना सार्वजनिक गरेको हो ।
नगरपालिकाका प्रमुख उपेन्द्र कार्कीका अनुसार ‘नगरपालिकाका कृषि योग्य जमिनमा प्राय सब्जीखेति गरिने भएकोले माटो सुधारको खाँचो रहेको छ । त्यसका लागि पहिलो चरणमा निशुल्क माटो परिक्षण गर्ने र आवश्यक स्थानहरुमा माटोको अवस्थामा सुधार ल्याउन ७५ प्रतिशत अनुदानमा किसानलाई कृषि चुन वितरण गरिने साथै विस्तारै नगरलाई अग्र्यानीक उत्पादनमा प्रोत्साहन गर्दै लैजाने’ समेत नगरप्रमुख कार्कीले बताउनु भयो ।
सामान्यतया माटोमा पिएचको मात्रा ६.५ देखि ७.५ सम्मलाई उत्पादनका लागि उपयुक्त मानिन्छ । रासायनिक मल तथा विषादीको बढ्दो प्रयोग एवं बाली चक्र नअपनाउनेजस्ता कारणले माटोमा अम्लीयपना घटबढ भएर उर्वरा शक्तिमा ह्रास आउने गरेको छ । विशेषगरी तरकारी खेती गरिने खेतबारीमा अम्लीयपना बढी देखिने भएकाले पहिलो चरणमा माटो सुधार कार्यक्रम अन्र्तगत सो कार्यक्रम लागु गरिएको प्रमुख प्रशासकीय अधिकृत सागर मिश्रले बताउनु भएको छ ।