समस्याग्रस्त सहकारीका ८ हजार ऋणीको अचल सम्पत्ति रोक्का, २९ करोड ऋण असुल

काठमाडौं– समस्याग्रस्त सहकारी संस्थाहरूका ८ हजार ऋणीहरूको जनखाता र अचल सम्पत्ति रोक्का गरिएको छ । भूमि व्यवस्था, सहकारी तथा गरिबी निवारणमा भूमि मन्त्री बलराम अधिकारीले बिहीबार पत्रकार सम्मेलन मार्फत दिएको जानकारी अनुसार ८ हजार ऋणी सदस्यहरूको खाता र अचल सम्पत्ति रोक्का गर्ने कार्य भएको छ ।

समस्याग्रस्त सहकारीका ऋणीहरूले लिएको ऋण पटक पटक ताकेता गर्दा समेत नतिरेपछि सरकारले उनीहरूको जनखाता र अचल सम्पत्ति रोक्का गरेको हो । समस्याग्रस्त घोषित सहकारी संस्थाहरूका ऋणीहरूबाट २९ करोड ऋण असुल भएको छ । पाँच वटा मार्ट व्यवस्थापन भएको छ । सहकारी संस्थाका ४८ सेवा केन्द्रको व्यवस्थापन भएको छ ।

समस्याग्रस्त सहकारी व्यवस्थापन समिति कार्यालय मार्फत बचतकर्ता र ऋणीबिच हिसाब मिलान गरी ३ अर्ब ७१ करोडको दायित्व मिलान भुक्तानी फरफारक गरिएको छ ।

सहकारी विभाग मार्फत ४० वटा सहकारी संघ संस्थाको सघन अनुगमन गरी देखिएका कमी कमजोरी सुधारका लागि निर्देशन दिइएको छ । कोपोसिम प्रणालीमा आर्थिक वर्ष २०८१÷८२ मा एक हजार ४९३ गरी हालसम्म १९ हजार १८९ सहकारी संस्थाहरू आबद्ध भएका छन् ।

सरकारले हालसम्म २३ वटा सहकारीलाई समस्याग्रस्त घोषण गरेको छ । समस्याग्रस्त सहकारी व्यवस्थापन समितिको कार्यालयबाट समस्याग्रस्त घोषित २३ मध्ये राफसाफ भएका सहकारी संस्थाहरू ५ वटा रहेकोमा सम्पत्ति व्यवस्थापन तथा दायित्व भुक्तानी हुन बाँकी सहकारी संस्था १८ वटा रहेका छन् । हालसम्म ६१ हजार ९४ कुल दाबीकर्ताहरूमध्ये ८ हजार ९८८ सदस्यहरूलाई बचत फिर्ता गरी सकिएको छ ।

समस्याग्रस्त सहकारी व्यवस्थापनको काम छिटो र छरितो प्रक्रियाबाट सम्बोधन गर्न पीडितहरूको बचत रकम फिर्ता र दायित्व फरफारक गर्ने कार्य योजना तयार पारिएको मन्त्री अधिकारीले जानकारी दिएका छन् ।

Image Source: © https://mulpatra.com