हुम्लामा पुग्यो बाटो र ९३२ किमि कालोपत्रे गरेको भौतिक मन्त्री दाबी
काठमाडौं– गत आर्थिक वर्षमा पहिलो पल्ट हुम्ला सदरमुकाम सिमकोटलाई राष्ट्रिय सडक सञ्जालमा जोडिएसँगै अब देशका ७७ वटै जिल्ला सदरमुकाममा यातायातको पहुँच स्थापित भएको सरकारले बताएको छ ।
भौतिक पूर्वाधार तथा यातायात मन्त्री देवेन्द्र दाहालले शुक्रबार मन्त्रालयमा पत्रकार सम्मेलन आयोजना गर्दै दुई दिन अघि समाप्त भएको आर्थिक वर्षको प्रगति विवरण प्रस्तुत गरेका हुन् । त्यसै क्रममा उनले हुम्लालाई राष्ट्रिय सडक सञ्जालमा जोड्नु यो सालको सबैभन्दा ठूलो उपलब्धी भएको बताएका छन् । ‘हुम्लालाई सडक सञ्जालमा जोडेर हामीले ऐतिहासिक उपलब्धि हासिल गरेका छौं’, उनले भने ।
मन्त्री दाहालले पोहोर साल जम्मा ९३० किलोमिटर सडक कालोपत्रे गर्ने लक्ष्य राखिएको भए पनि ९३२ किलोमिटरमा कालोपत्रे सम्पन्न भएको बताए । त्यस्तै देशभर १०५ वटा पक्की पुल र १० वटा बेलीब्रिजको निर्माण सम्पन्न भएको उनले जारनकारी दिए ।
मन्त्रालयले गत आर्थिक वर्ष २०८१ ८२ मा ७६.४१ प्रतिशत पूँजीगत खर्च गर्न सफल भएको र यो दर विगत ६ वर्षयताकै सबैभन्दा उच्च चएको दाबी गरेको छ ।
मन्त्रालयको प्रगति विवरणमा सवारी चालक अनुमतिपत्र (लाइसेन्स) को छपाइले पनि राम्रै ठाउँ पाएको छ । नागरिकले ३–४ वर्षसम्म पनि लाइसेन्स प्राप्त गर्न नसक्ने अहिलेको समस्या हल गर्न प्रदेश स्तरबाटै लाइसेन्स छाप्ने निर्णय गरिएको मन्त्री दाहालले सुनाए ।
त्यस्तै, यसअघि नै आवेदन दिएर छपाइ हुन नसकेका लाइसेन्स छाप्न सुरक्षण मुद्रण केन्द्रसँग सम्झौता गरिएको मन्त्री दाहालले बताएका छन् । यसका साथै ट्राफिक प्रहरीलाई नागरिक एपमार्फत् डिजिटल लाइसेन्स देखाउन सकिने र त्यही एपबाट ट्राफिक जरिवाना तिर्न पनि सकिने व्यवस्था गरेको भनेर मन्त्री दाहालले अब भौतिक प्रमाणपत्र (कार्ड) बोक्नुपर्ने बाध्यता हटिसकेको बताए ।
उनले पूर्व–पश्चिम रेलमार्गको निर्माण र पानीजहाज सञ्चालनका निम्ति देखिएका अवरोध हटाएर कानूनी एवमे संरचनागत व्यवस्था गरिएको बताए । यसले अब यी दुबै खाले पारवहन पूर्वाधारको निर्माण तथा सञ्चालनमा सहजता आउने मन्त्रालयको दाबी छ ।