ओलीले विद्यालाई राजनीतिकमा नफर्किन आग्रह गरे, उनले ‘समयले बोलायो, अब रोकिने अवस्था छैन’ भनेर जवाफ दिइन्
काठमाडौं– प्रधानमन्त्री समेत रहेका नेकपा एमालेका अध्यक्ष केपी शर्मा ओली र पूर्वराष्ट्रपति विद्यादेवी भण्डारीबीच भेटवार्ता भएको छ ।
उनीहरूबीच एमाले मुख्यालय च्यासलमा एक्लाएक्लै भेटवार्ता भएको थियो । भण्डारीले गत १४ असारमा एमाले राजनीतिमा पुनः सक्रिय हुने घोषणा गरेयता एमालेभित्र पक्ष र विपक्षमा मतहरू देखिन थालेका छन् ।
यसैबीच, आइतबार ओली र भण्डारीबीच भेटवार्ता भएको हो । यसलाई पार्टी पंक्तिमा चासोको साथ हेरिएको छ ।
ओलीले पूर्वराष्ट्रपति भण्डारीलाई सक्रिय राजनीतिमा नफर्कन सुझाव दिएको भण्डारीनिकट एक नेताले मूलपत्रलाई जानकारी दिए । ओलीले भण्डारीलाई ‘अब तपाईंले विश्राम लिनुहोस’ भन्ने आशयमा आग्रह गरे पनि भण्डारीको उत्तर संकेतपूर्ण रह्यो । उनले भनिन्, ‘समयले बोलायो’ जसलाई राजनीतिक वृत्तमा पुनः सक्रिय भूमिकातर्फको संकेतको रूपमा लिइएको भनेर भण्डारीको जवाफ थियो ।
बैंठकमा ओलीले भण्डारीलाई ‘अब तपाईं राजनीतिकमा आउँदा लोकतन्त्रमाथि प्रश्न हुने भन्दै राजनीतिमा नफर्कनुहोस् भनेको स्रोतले जनाएको छ ।
ओलीको यस्तो आग्रहपछि भण्डारीले छोटो तर स्पष्ट जवाफमा समयले बोलायो, म चुप बस्ने अवस्था छैन र अब कुरा पर पुग्यो । हजुरले अवरोध नगर्न भनेर आग्रह गरेको स्रोतले बतायो ।
भण्डारीको यो भनाइले उनी आगामी दिनमा सक्रिय भूमिकामा देखिन सक्ने संकेत गरिएको विश्लेषण गरिएको छ ।
एमाले भित्र छलफलमा हालै भण्डारीको अभिव्यक्तिहरू, सार्वजनिक कार्यक्रममा देखिएको सक्रियता, र राजनीतिक उपस्थितिलाई लिएर पनि चर्चा भएको थियो कतिपय नेताहरूले उनको सक्रियताले ओली नेतृत्वको हैसियतमा असर पार्न सक्ने आशंका व्यक्त गरेका छन् ।
पहिलोपटक यति खुला रूपमा ओली र भण्डारीबीचको असमझदारी सार्वजनिक भएको देखिएको छ । अब एमालेभित्रको शक्ति सन्तुलन कसरी अगाडि बढ्छ भन्ने प्रश्न उठिरहेको छ ।
पूर्वराष्ट्रपति भण्डारीले नेकपा एमालेमा आफ्नो सदस्यता पहिल्यै नवीकरण भइसकेको बताएकी छिन् ।
आइतबार प्रधानमन्त्री समेत रहेका अध्यक्ष केपी शर्मा ओलीसँगको भेटवार्तापछि सञ्चारकर्मीसँग कुराकानी गर्दै उनले यस्तो बताएकी हुन् । ओलीसँगको भेटवार्ताका क्रममा आफूले राष्ट्रिय राजनीतिबारे मात्रै कुराकानी गरेको उनले बताइन् ।
स्रोतका अनुसार, प्रधानमन्त्री ओलीले आइतबार बिहान सम्पर्क गरेर भण्डारीलाई बालुवाटार आउन आग्रह गरेका थिए । तर, ओलीको उक्त अनुरोध भण्डारीले अस्वीकार गरेको र पार्टी कार्यालयमा मात्र भेट्ने भनेकाले सोही अनुसार भेट भएको उनी निकट स्रोतको भनाइ छ ।
आगामी भदौमा विधान महाधिवेशनको तयारी गरिरहेको एमालेले पछिल्ला केही दिन लगातार पार्टी बैठक चलाइरहेको छ । सचिवालय, पोलिटब्युरो लगायतका बैठकमा औपचारिक रुपमा भण्डारीको राजनीतिक संलग्नताको इच्छाबारे छलफल थालिएको छ ।
भोली देखि बस्ने पार्टीको केन्द्रिय कमिटिको बैठकमा समेत उक्त कुराले स्थान पाउने देखिएको छ ।