नीलो क्रान्तिको चर्चा भइरहेका बेला सिधै जेनजीले रातो क्रान्ति गरे

काठमाडौं– राष्ट्रिय स्वतन्त्र पार्टी (रास्वपा) को विस्तारित बैठकमा कार्यवाहक सभापति डीपी अर्यालले राजनीतिक प्रतिवेदन प्रस्तुत गरेका छन् । उनको प्रतिवेदनमा हालैको जेनजी आन्दोलनदेखि राष्ट्रिय राजनीतिका प्रमुख एजेन्डाहरूमा पार्टीको विचारधारा थप स्पष्ट गरिएको छ ।

उपसभापति अर्याल गत भदौ २३ र २४ गतेको घटनालाई पुराना दलको शासकीय अनैतिकता र अक्षमताको परिणामका रूपमा व्याख्या गरेका छन् ।

प्रतिवेदनमा भनिएको छ, ‘शासकहरूले आफ्नो भविष्य बरबाद पारे भन्ने तीव्र असन्तुष्टिले उनीहरू परिवर्तनको हिस्सा मात्र होइन, निर्णायक शक्ति नै बन्न अगाडि सर्दा जेनजी आन्दोलन भयो ।’

भदौ २३ र २४ गतेको घटनाको अनुसन्धान र कारबाही सरकारको तत्कालीन कार्यभार भएको प्रतिवेदनमा उल्लेख गरिएको छ ।

‘आन्दोलन हिंसात्मक बनेपछि जेनजीले २३ गते दिउँसै प्रदर्शन अन्त्यको घोषणा गरिसकेका थिए । तर सरकारको चरम दमन र विद्यालय पोशाकमा आएका विद्यार्थी लगायतको हत्यापछि जनस्तरबाटै प्रतिवाद हुँदा आन्दोलन निर्णायक र सफल भएको हो,’ प्रतिवेदनमा भनिएको छ ।

अर्यालले तत्कालीन प्रधानमन्त्री केपी ओलीलाई २४ गतेको घटनाले राजीनामा दिन बाध्य पारेको बताएका छन् ।

उनले लेखेका छन्, ‘स्कुले विद्यार्थीले ज्यान गुमाउनु परेको दुखमा होइन, आफ्नै सुरक्षाको चिन्तामा ओलीले प्रधानमन्त्रीबाट राजीनामा दिनुभएको हो ।’

२४ गतेको विध्वंसमा राजनीतिक कार्यकर्ताको सक्रियता रहेको तथ्य फोटो र भिडिओहरूबाट खुलेको अर्यालले उल्लेख गरेका छन् । सार्वजनिक भएका केही तथ्यले भदौ २४ को घटना योजनावद्ध हो कि भन्ने आशंकालाई बढाएको उनको भनाइ छ ।

प्रतिवेदनमा भनिएको छ, ‘२३ गते राज्य शक्तिको दुरुपयोगमा जनहत्या भएकै कारण २४ गतेका घटना भएका हुन् । तर, दुवै दिनका घटनाको निष्पक्ष छानबिन गरी अपराध र संलग्नताको आधारमा दोषीलाई कारबाही गर्नुपर्छ ।

रास्वपा २०८४ मा मतबाटै निलो क्रान्ति गर्ने योजनामा रहेको तर जनेजीले रातो क्रान्ति गरिदिएको टिप्पणीसमेत प्रतिवेदनमा गरिएको छ । जेनजी आन्दोलनको म्यान्डेट र भावनालाई संस्थागत गर्न भने बाँकी रहेको भन्दै प्रतिवेदनमा त्यसको पहिलो र अनिवार्य प्रक्रिया निर्वाचन नै भएको निष्कर्ष निकालिएको छ ।

कार्यवाहक सभापति अर्यालले जेनजी आन्दोलनको बलमा बनेको दलविहीन अन्तरिम सरकारलाई बाध्यताको उपज भनेका छन् ।