प्रधानमन्त्रीको आव्हानमा प्रमुख पाँच दल सहित सर्वपक्षीय बैठक बस्दै

काठमाडौं । प्रधानमन्त्री सुसिला कार्कीले बोलाएको सर्वपक्षिय बैठक आज ४ बजे बस्ने भएको छ । सरकारले घोषणा गरेको फागुन २१ को निर्वाचन नजिकिँदै गर्दा प्रधानमन्त्रीले उक्त बैठक आव्हान गरेकी छिन् । राष्ट्रिय सभाको निर्वाचन समेत यही माघ ११ गते हुँदैछ ।

जेनजी आन्दोलनका क्रममा देशभरिबाट लुुटिएको हजारौ हतियार, गोली सहित हाल सम्म फेला पर्न सकिरहेको छैन । यस्तो बेला निर्वाचनको सुरक्षाको चुनौतिको बहस सवत्र भइरहेको बेला प्रधानमन्त्रीले प्रमुख राजनीतिक दलहरुलाई छलफलमा बोलाएकी हुन ।

बालुवाटारस्थित प्रधानमन्त्री निवासमा अपराह्न चार बजे बोलाइएको बैठकमा निर्वाचन आयोग, राजनीतिक दलका प्रमुख तथा प्रतिनिधिहरू, सुरक्षा निकाय र सरकारका प्रतिनिधिहरू पनि सहभागी रहने सचिवालयले जनाएको छ ।

बैठकमा प्रमुख पाँच राजनीतिक दल नेकपा एमाले, नेपाली कांग्रेस, नेपाली कम्युनिष्ट पार्टी, रास्वपा र राप्रपा बोलाईको बुझिएको छ । बैठकमा यी पाँच राजनीतिक दल, सरकार, निर्वाचन आयोग र सुरक्षा निकायका प्रमुखहरुको उपस्थित रहने छ ।