अमेरिकाको भेनेजुएलामाति तत्काल एक्सन, तेल उद्योगमा विदेशी कम्पनीलाई लगानीका लागि नयाँ कानुन ल्यायो

काठमाडौं– भेनेजुएलाको संसद्ले विदेशी कम्पनीलाई देशको तेल उद्योगमा सहभागी हुन सहज बनाउने नयाँ कानुन पारित गरेको छ । कार्यवाहक राष्ट्रपति डेल्सी रोड्रिगेजको समर्थनमा पारित यस सुधारले हाल राज्य स्वामित्वको पीडीभीएसएको नियन्त्रणमा रहेको तेल क्षेत्रमा विदेशी कम्पनीलाई आफ्नै जोखिम र लगानीमा तेल क्षेत्र सञ्चालन गर्न अनुमति दिनेछ ।

अमेरिकी राष्ट्रपति डोनाल्ड ट्रम्पको प्रशासनले भेनेजुएलामा अमेरिकी लगानी चाहेको सन्देश दिँदै आएका बेला यो कदम चालिएको हो । भेनेजुएलासँग विश्वकै सबैभन्दा ठूलो प्रमाणित तेल भण्डार रहेको र नयाँ कानुनले त्यसबाट देशको आम्दानी बढाउन मद्दत गर्ने रोड्रिगेजले बताएको सीएनएनले जनाएको छ ।

संसद्का अध्यक्ष होर्खे रोड्रिगेजले यो सुधारले अविकसित तेलक्षेत्रमा उत्पादन बढाई जनताको जीवनस्तर सुधार्ने दाबी गरेका छन् । संसद्ले दोस्रो वाचनमा सर्वसम्मत रूपमा कानुन पारित गरेको हो, जसलाई अब हस्ताक्षर र प्रकाशनपछि कार्यान्वयन गरिनेछ ।

यसैदिन अमेरिकी अर्थ मन्त्रालयले भेनेजुएलाको तेल क्षेत्रमा लगाइएका केही प्रतिबन्ध खुकुलो बनाउँदै अमेरिकी कम्पनीलाई तेलको खरिद–बिक्री, भण्डारण र ढुवानीजस्ता गतिविधि गर्न अनुमति दिएको छ ।