रास्वपाको मुख्य सचेतकमा बुर्लाकोटी

काठमाडौं– राष्ट्रिय स्वतन्त्र पार्टी (रास्वपा) ले एक जना मुख्य सचेतक र दुई जना सचेतक चयन गरेको छ ।

बिहीबार सिंहदरबारमा बसेको संसदीय दलको बैठकले पार्टीका महामन्त्री एवं गोरखा क्षेत्र नम्बर २ बाट निर्वाचित सांसद कविन्द्र बुर्लाकोटीलाई प्रमुख सचेतकको जिम्मेवारी दिने निर्णय गरेको छ ।

पार्टीभित्र कुशल संगठकका रूपमा चिनिने बुर्लाकोटीले अब संसद्मा पार्टीको उपस्थिति र भूमिकालाई समन्वय गर्ने मुख्य जिम्मेवारी सम्हाल्नेछन् ।

यसैगरी रास्वपाले सामान्यतया एक जना मात्र सचेतक राख्ने संसदीय अभ्यासभन्दा भिन्न दुई जना सचेतक नियुक्त गरेको छ । पार्टीले कार्यबोझ र समावेशितालाई ध्यानमा राख्दै दुई जना सचेतक तोकेको बताइको छ ।

विवेकशील साझा पार्टी हुँदै रास्वपामा समाहित भएका प्रकाशचन्द्र परियारलाई सचेतकको जिम्मेवारी दिइएको हो । उनीसँग सञ्चार र राजनीतिक संगठनको लामो अनुभव छ । यसैगरी क्रान्तिशिखा धिताललाई पनि सचेतकको जिम्मेवारी दिइएको छ ।

टेलिभिजन पत्रकारिताबाट राजनीतिमा आएकी समानुपातिक सांसद धिताललाई पनि सचेतकको भूमिका दिइएको हो । महिला प्रतिनिधित्व र युवा जोशलाई संसद्मा प्रभावकारी बनाउन उनको नियुक्ति महत्वपूर्ण मानिएको छ ।

Image Source: © https://mulpatra.com

पार्टीका महामन्त्रीलाई नै प्रमुख सचेतकको जिम्मेवारी दिइनुले रास्वपाले संसद्लाई उच्च प्राथमिकतामा राखेको संकेत गरेको छ ।