संघको अध्यक्षमा चर्चित अनुहारकै चर्चा: स्वतन्त्र व्यवसायीलाई चुनौती दिन पुरानाका युवा मैदानमा, भुवनको लिँडे ढिपी कायमै

काठमाडौं–नेपाल वैदेशिक रोजगार व्यवसायी संघको आगामी नेतृत्वका लागि अध्यक्षसहित पदाधिकारी उम्मेदवारका आकांक्षीहरुको चर्चा सुरु भएको छ । यस पटक चुनावी मैदानमा व्यवसायीका लागि उचित वकालत गर्नेदखि युवा व्यवसायी आकांक्षीको चर्चा छ ।

जिल्ला प्रशासन कार्यालय काठमाडौंले दिएको पछिल्लो निर्देशन दिएअनुसार नै संघको प्रबन्ध समितिले बुधबार पत्रकार सम्मेलन गरी जेठ २४ गते नयाँ कार्यसमितिका लागि मतदान गराउने दाबी गरेको छ ।

तर कार्यालयको निर्देशनविरुद्ध भुवनसिंह गुरुङको समुह भने अदालत जाने तयारीमा छ । प्रबन्ध समितिका सदस्य राजेन्द्र भण्डारीले जिल्ला प्रशासनको निर्देशनअनुसार निर्वाचनसहितको विशेष साधारण सभाको प्रक्रिया द्रूतगतिमा काम भइरहेको र सोही मितिमा निर्वाचन गर्नेगरी समिति अगाडि बढेको जानकारी दिए ।

निर्देशन अदालतको आदेशबाट बदर गराउने चर्चा चलाएपछि बुधबार साँझसम्म आकांक्षी व्यवसायीहरूले औपचारिक रूपमा उम्मेदवारी घोषणा भने गरेका छैनन् । तर विधानमा भएअनुसार र नै कार्यालय निर्देशन दिएका कारण अहिले व्यवसायीहरु साधारणसभाको तयारीमा छन् ।

हिजो भएको पत्रकार सम्मलेनमा पत्रकारहरुको प्रश्नको जवाफ दिँदै भण्डारीले प्रबन्ध समितिले कुनै पनि पक्ष वा विपक्षमा नलागि निष्पक्षरुपमा निर्वाचन सम्पन्न गर्ने उल्लेख गर्दै चुन्ने र चुनिने आफ्नो अधिकार प्रयोग गरेर नयाँ नेतृत्व निर्माण गरिने कार्यमा सरिक हुन सबै व्यवसायीहरुसँग अपिल गरे ।

संघको चुनावी प्रतिस्पर्धामा नेपाली कांग्रेसनिकट नेपाल लोकतान्त्रिक वैदेशिक रोजगार व्यवसायी एसोसिएसन, एमाले निकट प्रगतिशील वैदेशिक रोजगार व्यवसायी मञ्च नेपाल, नेपाली कम्युनिस्ट पार्टी निकट गणतान्त्रिक वैदेशिक रोजगार व्यवसायी मञ्च र एकीकृत वैदेशिक रोजगार व्यवसायी संगठन मुख्य प्रतिस्पर्धी रहेकोमा यसपटक सरकार निकट मानिने स्वतन्त्र वैदेशिक रोजगार व्यवसायी समूह पनि थपिएको छ ।

Image Source: © https://mulpatra.com

व्यवसायीमा पार्टी युनियन अथवा कुनैपनि भातृसंगठन नखोल्ने भनेको राश्वपाले पनि यसपटक साधारण सभामार्फत निर्वाचनमा होमिने भएको छ ।

स्वतन्त्र व्यवसायीका अध्यक्ष कृष्णप्रसाद ढकालले आफूहरूले ७ पदाधिकारी र १० सदस्य गरी निर्वाचन हुने सबै १७ पदमा उम्मेदवार उठाउने गरी छलफल भइरहेको र उम्मेदवार समेत आन्तिरक रुपमा छान्ने काम भइरहेको संकेत गरेका छन् ।

संघको आगामी निर्वाचनमा एसोसिएसनका तर्फबाट विघटित कार्यसमितिका द्वितीय उपाध्यक्ष देवकुमार खोखालीको चर्चासँग उनी लविङमा छन् । उनले २ महिनाअघि नै संघमा व्यवसायीले लगाएको ताला फुटाउने संघ कार्यालय तोडफोडमा उत्रिएका थिए । खोखाली तत्कालिन अध्यक्ष भुवन गुरुङनिटक हुन् । गुरुङको नाम लिएर उनले धेरै व्यवसायीलाई आंतकित बनाएको आरोप छ ।

मञ्चका तर्फबाट पू्र्वप्रथम उपाध्यक्ष डिक बहादुर खत्री ‘कुमार’ र पूर्वतृतीय उपाध्यक्ष तथा मञ्चका महासचिव मिलन कट्टेलमध्ये एक, एकता समितिका तर्फबाट अध्यक्ष तथा पूर्वप्रथम उपाध्यक्ष हरिबहादुर पाण्डे क्षेत्रीसहित संघका पूर्वमहासचिव मेघनाथ भुर्तेललगायतको अध्यक्षमा चर्चा छ ।

मिलन युवा व्यवसायी हुन् । उनले अध्यक्षमा उम्मेदार दिएको खण्डमा स्वतन्त्र व्यवसायीलाई चुनौती हुन्छ ।

स्वतन्त्र व्यवसायीको उपस्थितिले यसअघिको निर्वाचना प्यानल बनाएर प्रतिस्पर्धा गरेका घटकहरू शक्ति पुनःमूल्यांकनको अवस्थामा देखिन्छन् । त्यसलाई चुनौती सिर्जना गर्ने युवा व्यवसायीपनि मैदानमा उत्रिने संकेत गरिरहेका छन् ।

म्यानपावर व्यवसायीका हकमा पुर्वमहासचिव भुर्तेल पनि परिचित र उनले कार्यसमितिमा बसेर कामदारसँगै सरकारसँग नीतिगत सुधारमा दबाबनै दिएर काम गरेका थिए । स्पष्ट वक्ताको छवी बनाएका मेघनाथ अध्यक्षका बलियो उम्मेदवारका रुपमा व्यवसायीले नै बताइरहेका छन् ।

नेपालमा सबैभन्दा बढी कामदार पठाउने व्यवसायी समेत रहेका भुर्तेलले महासचिव भएका बेला नीतिगत सुधारका लागि पहल गरेकै कारण अहिले सरकारले कतिपय समस्या समाधान गरिरहेको छ ।

पुर्ववरिष्ठ उपाध्यक्ष केसीपनि वैदेशिक रोजगारी सुधारका विषयमा प्रष्ट धारण राख्ने व्यवसायी हुन् । उनले वैदेशिक रोजगारी क्षेत्रका नीतिगत सुधारका लागि आफनो कार्यकालमा दबाबनै दिएर आवाज उठाउँदै आएका व्यवसायी हुन् । व्यवसायी राजनीतिभन्दा व्यवसायीका विषयमा गम्भीर भएर बोल्ने भनेर वैदेशिक रोजगारी क्षेत्रमा उनी परिचित छ ।

नेपाल लोकतान्त्रिक वैदेशिक रोजगार व्यवसायी एसोसिएसनको असन्तुष्ट पक्ष, नेपाल वैदेशिक रोजगार व्यवसायी एकता समिति पनि प्रत्यक्ष–अप्रत्यक्ष रूपमा संघको राजनीतिभित्र उत्तिकै सक्रिय रुपमा छन् ।

एकता व्यवसायीका तर्फबाट पाण्डेपनि अध्यक्षमा उम्मेदवार दिदै तयारीमा छन् । हालसम्म निर्वाचनमा उनी नेतृत्व व्यवसायीको राजनीतिक पनि सक्रिय छ ।

निवर्तमान अध्यक्ष भुवनसिंह गुरुङको कार्यशैलीप्रति असन्तुष्टि जनाउँदै गत वैशाख १४ गते कार्यसमितिका सात जना पदाधिकारीमध्ये पाँच जना र १० जना सदस्यमध्ये छ जनाले सामूहिक राजीनामा दिएका थिए ।

संघको विधानको दफा २६ को उपदफा (४) को व्यवस्थाबमोजिम कार्यसमितिका दुईतिहाइ पदाधिकारीले सामूहिक राजीनामा दिए कार्यसमिति स्वतः विघटन हुने प्रावधान छ ।

त्यसबीचमा विवाद मिलाउने प्रयास भए पनि सफल नभएपछि वैशाख २८ गते अध्यक्ष गुरुङ नेतृत्वको कार्यसमिति विघटन गरी सोही दिन सल्लाहकारहरुको रोहबरमा प्रबन्ध समिति गठन गरिएको थियो । उक्त समितिले २१ दिनभित्र विशेष साधारणसभा बोलाएर निर्वाचन सम्पन्न गराउनुपर्ने विधानमा उल्लेख छ ।

गुरुङ पक्षले भने निर्वाचन स्वीकार गरेको छैन । स्वार्थ समूहको चलखेलमा निर्वाचन गर्न लागिएको भन्दै यसलाई रोक्न गुरुङ बुधबार नै अदालत पुगेको स्रोतले बतायो । गुरुङले आजै अदालतबाट ‘स्टे अर्डर’ पाउने दाबी गरिरहेका छन् ।