राजनीतिक शक्ति समीकरणकै लागि ओलीलाई भेट्न पुगे प्रचण्ड, तत्काल सम्भव छ?

काठमाडौं– नेकपा (एमाले) र नेपाली कम्युनिष्ट पार्टी (नेकपा)बीच एकताको छलफलले निरन्तरता पाइरहेको छ ।

गत फागुन २१ मा सम्पन्न निर्वाचनको अन्तिम परिणाम सार्वजनिक हुनुअघिदेखि दुई दलमा वाम एकताको विषयले प्राथमिकता पाएको थियो ।

त्यसयता दुवै दल तेस्रो तहका नेता हुँदै नेतृत्व तहसम्म यस विषयमा छलफल भइरहेको बताइएका बेला एमाले अध्यक्ष केपी शर्मा ओली र नेकपाका संयोजक पुष्पकमल दाहाल प्रचण्डबीच भेटवार्ता भएको छ ।

ओलीलाई भेट्न बिहीबार साँझ प्रचण्ड त्रिवि शिक्षण अस्पताल पुगेका थिए । पित्तथैलीमा रहेको पत्थरीको शल्यक्रिया गरेर अस्पतालमै स्वास्थ्य लाभ गरिरहेका ओलीलाई भेट्न प्रचण्ड हस्पिटल नै पुगेका हुन् ।

भेटमा प्रचण्डले ओलीको स्वास्थ्यलाभको कामना गरेका थिए । उनीहरुबीच पछिल्लो विकसित राजनीतिक तथा समसामयिक विषयमा पनि छलफल भएको छ । आ–आफ्ना नेताको सन्देश बोकेर दुवै दलका नेताहरु ओली र प्रचण्डलाई भेटेका थिए । जसले दुई शीर्ष नेताबीचको भेट जुराएको हो ।

माधवकुमार नेपाल, झलनाथ खनालसहितका नेकपाका नेताहरुलाई एमालेका नेताहरुले भेटेका थिए । यस्तै, शुक्रबार पनि एमालेकै एक पदाधिकारीले प्रचण्डलाई भेटेर पार्टी एकताको वातावरण बनाउने विषयमा छलफल भएको छ ।

Image Source: © https://mulpatra.com

एमाले र नेकपाबीच एकता गरेर संघीय संसदमा आफूहरुलाई बलियो शक्तिको रुपमा उभ्याउने दुवै दलको रणनीति देखिन्छ । हालै सम्पन्न निर्वाचनले प्रतिरक्षामा पु¥याइएका एमाले र नेकपाबीच पार्टी एकताको विषयले घनिभूत छलफल पाएको हो । दुवै दल एकता भएमा प्रतिनिधिसभामा कांग्रेसलाई पछि पारेर प्रमुख प्रतिपक्षी दलको हैसियत पाउनेछ ।

सरकारले आफूहरुमाथि धरपकड गर्न थालेको बुझेका एमाले, नेकपा मात्रै होइन कांग्रेससहित पुराना भनिएका दलहरु अहिले रक्षात्मक अवस्था छन् ।